Жамбыл облысының тұрғыны жұбайына орташа ауырлықтағы дене жарақатын салып, енді оны емдеуге жұмсалған қаражатты мемлекетке өтеуге міндеттелді, — деп хабарлайды infohub.kz сайты.
NUR.KZ облыс сотына сілтеме жасап хабарлағандай, соттың баспасөз қызметі нақтылаған: ер адам мемлекеттің зардап шеккен әйелге медициналық көмек көрсетуге жұмсаған ақшасын қайтаруға міндеттелді. Азаматтық іс аудан прокурорының жергілікті тұрғын — А. есімді азаматтан мемлекетке келтірілген материалдық залалды өндіріп алу туралы талап арызы бойынша қозғалды.
Анықталған мән-жайларға сәйкес, ер адам әйеліне орташа ауырлықтағы дене жарақатын салған. Зардап шеккен әйелді аудандық ауруханаға жеткізіп, ол сонда ем қабылдаған. Медициналық көмек көрсетуге мемлекет қаражатынан 330 мың теңге жұмсалған.
«Бұған дейін А. қатысты қылмыстық іс тараптардың татуласуына байланысты тоқтатылған еді. Алайда мемлекеттің зардап шеккен әйелді емдеуге жұмсаған шығыны өтелмей қалды. Мемлекет мүддесін қорғау мақсатында прокурор сотқа осы соманы өндіріп алу туралы талап арызбен жүгінді. Сот ұсынылған барлық дәлелдемелер мен іс материалдарын зерделей келе, талап арыздың негізді деген қорытындыға келді», — деп түсіндірді сотта.
Сот шешімімен талап арыз толық көлемде қанағаттандырылды: жауапкерден мемлекет пайдасына материалдық залалды өтеу есебінен 330 мың теңге, сондай-ақ мемлекеттік баж өндірілді.