Жамбыл облысында сот мектеп директорының орынбасары қызметіне үміткердің жағына шығып, оқу орнының басшылығын оның жұмысқа қабылдау туралы өтінішін қарауға міндеттеді. Бұл туралы infohub.kz сайты хабарлайды.
Жамбыл облысы соттарының ресми Telegram-арнасында жазылғандай, Тұрар Рысқұлов ауданының соты азаматтың мектеп-гимназия директорына қарсы әкімшілік ісін қарады. Талапкер жауапкердің әрекетсіздігін заңсыз деп танып, оған жұмысқа қабылдау туралы өтінішті қарау міндетін жүктеуді сұрады.
2026 жылдың наурызында мектепте тәрбие жұмысы жөніндегі директор орынбасары қызметіне конкурс өтті. Алғашқы іріктеу қорытындысы бойынша талапкер біліктілік талаптарына сәйкес деп танылды. Алайда конкурсқа қатысушылардың бірінің апелляциялық шағымынан кейін конкурс комиссиясы кандидаттарды бағалау нәтижелерін қайта қарады.
Құжаттарды қайта қарау қорытындысы бойынша талапкер 2-орынды иеленді. Конкурс жеңімпазы кейіннен қызметке тағайындалудан өз еркімен бас тартты.
Осыған қарамастан, мектеп қызметті келесі кандидатқа ұсынудың орнына жаңа конкурс өткізу қажеттігін хабарлады. Талапкер бұл шешіммен келіспей, сотқа жүгінді.
Сот Ережелерге сәйкес, егер конкурс жеңімпазы тағайындалудан бас тартса, қызмет ең көп балл жинаған келесі қатысушыға ұсынылатынын анықтады. Бұл ретте Ережелер қатысушылардың бірінің шағым беруі себебімен ғана конкурсты қайта өткізуді көздемейді.
Сот мектеп директорының әрекетсіздігі талапкердің құқықтарын бұзды деген қорытындыға келді.
Сот шешімімен әкімшілік талап қанағаттандырылды. Мектеп директорының әрекетсіздігі заңсыз деп танылды. Директорға талапкердің жұмысқа қабылдау туралы өтінішін қарау міндеті жүктелді.
Мектептен талапкердің пайдасына мемлекеттік баж өндірілді. Шешім заңды күшіне енді.