Жер мен Марс 4,5 миллиард жыл бұрын Күн жүйесінде қатар орналасса да, мүлде бөлек сценарийлермен пайда болған. Копенгаген университетінің зерттеушілері екі планетаның мантиясының химиялық құрамын зерттеп, осындай тұжырымға келді, деп хабарлайды infohub.kz сайты.
SciTechDaily жазуынша, екі аспан денесінің массасы әртүрлі құрылыс материалынан жиналған. Жердің шамамен 75%-ы жас протопланеталардың ұсақ ғарыштық қиыршық тастарды ұстап қалуы есебінен жиналған заттан тұрады. Қалған ширек массасы планетаға ірі астероид тәріздес денелер — планезимальдармен соқтығысудан жеткен.
Марстағы жағдай керісінше болып шықты. Қызыл планета массасының төрттен үшке жуығы дәл ірі планезимальдардың соқтығысып бірігуінің арқасында қалыптасса, қалған ширегі ғана ұсақ бөлшектердің біртіндеп ұсталуына тиесілі.
Жұмыс барысында зерттеушілер компьютерлік модельдеуді қолданып, натрий, мырыш және калий сияқты ұшпа элементтердің мөлшерін бағалады. Бұл химиялық іздер миллиардтаған жыл бойы сақталып, аспан денелерінің қалыптасу жағдайларын дәлірек анықтауға мүмкіндік береді.
Авторлардың пікірінше, бұл ашылым астрономдарға біздің жүйеден тыс экзопланеталардың су қорын және тіршілікке жарамдылық әлеуетін дәлірек бағалауға көмектеседі.