Қазақстан Республикасының Жоғары аудиторлық палатасы Қорғаныс министрлігінің қызметіне мемлекеттік аудит жүргізуді бастады. Тексерудің басталғаны туралы ведомство өзінің Telegram-арнасында хабарлады, деп жазады infohub.kz сайты.
Аудит бюджет қаражатының тиімді пайдаланылуын, сондай-ақ әскери бөлімшелерді материалдық-техникалық қамтамасыз ету мәселелерін қамтиды.
Еске салайық, Маңғыстау облысында әскери қызметшілердің қаза табуынан кейін Қазақстан Президенті Қасым-Жомарт Тоқаев Қорғаныс министрлігіндегі істердің жай-күйін кешенді тексеру жөніндегі комиссия құру туралы өкімге қол қойған болатын.
Сонымен қатар ведомство басшылығында кадрлық өзгерістер болды. Дәурен Қосанов Қазақстан Республикасының Қорғаныс министрі қызметінен босатылды. Оның орнына Айдос Мырзахметов тағайындалды.
Қайғылы оқиға 24 қыркүйекте оқу-жауынгерлік тапсырманы орындау барысында болды: ауа райының кенеттен нашарлауы мен екпінді желдің салдарынан Каспий теңізіне 17 әскери қызметші ағып кетті, олардың 14-і қаза тапты.
Үшеуі құтқарылды, біреуі ауруханаға жатқызылды. Күні бұрын облыстық денсаулық сақтау басқармасы пациент Маңғыстау облыстық көпбейінді ауруханасына жеткізілгенін хабарлаған. Әскери қызметшінің жағдайы тұрақты ауыр деп бағаланған.
Аман қалғандардың арасында Атырау облысынан 19 жастағы Бекет Қуандық және Батыс Қазақстан облысынан Никита Удалов бар.