Батыс Қазақстан облысында Қаржылық мониторинг агенттігінің қызметкерлері астықтың «сұр» импортының схемасын әшкереледі: өнім шетелден әкелініп, қазақстандық шаруа қожалықтарының өнімі ретінде көрсетілген. Бұл туралы infohub.kz сайты хабарлайды.
Тергеу нұсқасы бойынша, қылмыскерлер жалпы құны 11,2 млрд теңге болатын шамамен 130 мың тонна импорттық астықты заңсыз әкелген. Бөтен тауарды заңдастырып, оны Қазақстанда өндірілген деп көрсету үшін делдалдар жалған компаниялар мен жалған мәмілелер тізбегін құрған. «Bakery Nan», «KazGrano», «Perfect Seed», «Weizen» және «Golden Grain Kazakhstan» ЖШС-тері күні бұрын сенім білдірілген адамдарға тіркелген.
Отандық фермерлік қожалықтармен жалған сатып алу-сату шарттары жасалған. Бұл импорттық астыққа қазақстандық құжаттарды рәсімдеуге және оны Өзбекстанға, Ауғанстанға және Тәжікстанға кедергісіз экспорттауға мүмкіндік берген.
Тауардың шығу тегі туралы құжаттармен айла-шарғы жасаудың басты мақсаты – жеңілдікті ішкі теміржол тарифін алу болған. Қазақстандық астықты ел аумағымен тасымалдау халықаралық транзитке қарағанда әлдеқайда арзан. Нәтижесінде импортты жергілікті өнім ретінде көрсету салдарынан «ҚТЖ – Жүк тасымалы» компаниясы 1 млрд теңгеден астам транзиттік тарифтен қағылған.
Сонымен қатар, фигуранттар ақшаны өздерімен байланысты шоттарға шығарып, салық төлемеу үшін банкроттық рәсімдерін әдейі бастаған. Мемлекетке келтірілген жалпы шығын 1,2 млрд теңгені құрады. Іс бойынша бес адам күдікті деп танылды, тергеу аяқталып, сотқа жіберілуде.
Бұған дейін Қазақстанның солтүстік және орталық облыстарындағы қуаңшылық астық өніміне қауіп төндірген болатын.