Saýda jáne ıntegrasıa mınıstrliginiń málimetinshe, 2026 jyldyń birinshi jartyjyldyǵynda Qazaqstan tutynýshylary aqaýly ónimder men sapasyz qyzmetter úshin 1,5 mlrd teńge qaıtaryp aldy. Qaıtarym somasy ótken jyldyń osy kezeńimen salystyrǵanda 15,3% ósken, dep habarlaıdy infohub.kz saıty.
Shaǵymdardy qaraý nátıjesinde 15 myń tutynýshynyń talaptary qanaǵattandyryldy. Taǵy 15,4 myń adam zańgerlik kómek pen keńes aldy, al 12 myń azamattyń ótinishi tıisti memlekettik organdarǵa jiberildi.
Satyp alýshylardyń shaǵymdary negizinde aýmaqtyq departamentter 776 tekserý júrgizdi. Nátıjesinde 892 ákimshilik is qozǵalyp, salynǵan aıyppuldardyń jalpy somasy 17,3 mln teńgege jetti.
Eń iri qaıtarymdardyń biri – Lexus LX 600 avtokóliginiń satyp alýshysyna ótemaqy tóleý. Departamenttiń quqyqtyq qoldaýynan keıin «Toyota Tsusho Kazakhstan Auto» JSHS kompanıasy tutynýshyǵa kóliktiń tolyq qunyn – 79,49 mln teńgeni qaıtardy.
Jyljymaıtyn múlik satyp alýshylary da edáýir somalardy qaıtaryp aldy. Mańǵystaý oblysynda «Tuha Development» turǵyn úı qurylys kooperatıvimen úlestik qatysý sharty boıynsha daý sotsyz retteldi: tutynýshyǵa 14 mln teńgeden astam tólendi. Shymkentte «Kanfar Búldıng» JSHS-nen satyp alynǵan páterdiń satyp alýshysy turǵyn úıden anyqtalǵan kemshilikter týraly shaǵymdy qaraý nátıjesinde 15,1 mln teńgeni qaıtaryp aldy.
Sonymen qatar Qazaqstanda «Sapaly ónim» jobasy aıasynda ónimniń qaýipsizdigi men sapasyn tekserý jalǵasty. Jartyjyldyqta mamandar 874 taýar túrin zerttep, 623 ataý boıynsha buzýshylyqtar anyqtady. Anyqtalǵan jaǵdaılardyń basym bóligi (84%) durys tańbalanbaýǵa baılanysty bolsa, taǵy 16% sanıtarlyq-epıdemıologıalyq talaptarǵa qatysty. Tekserý qorytyndysy boıynsha 462 kásipkerge qatysty shara qoldanyldy.