Óskemende tehnogendik tótenshe jaǵdaılar kezinde qalalyq bıliktiń naqty is-áreket tártibi bekitildi. Ol ákimdik pen zańger, qoǵam belsendisi Alekseı Bojkov arasyndaǵy medıatıvtik kelisimge negizdelgen. Bul týraly Shyǵys Qazaqstan oblysynyń mamandandyrylǵan aýdanaralyq ákimshilik sotynyń qaýlysynda aıtylǵan, dep habarlaıdy infohub.kz.
Sotqa deıin taraptar tatýlasý kelisimine keldi, sot ony zań talaptaryna saı dep tanyp, qaýlysymen bekitti. Kelisim sharttary boıynsha, Óskemen ákimi 2026 jyldyń 30 shildesine deıin qaýipti óndiris nysandary men ýly, kúshti áser etetin ýly jáne basqa da qaýipti zattar qoldanylatyn kásiporyndarda tehnogendik tótenshe jaǵdaılar týyndaǵan kezde halyqty habardar etýdiń mindetti reglamentin ázirlep, bekitýi tıis.
Qujatta bolashaq reglamentke naqty talaptar qarastyrylǵan. Atap aıtqanda, halyq tótenshe jaǵdaı týraly aqparat alǵannan keıin on mınýt ishinde habardar etilýi tıis. Ári qaraı bılik turǵyndarǵa naqtylanǵan málimetterdi kezeń-kezeńimen jetkizýge mindettenedi: oqıǵa orny, tótenshe jaǵdaıdyń sıpaty, qaýipti zattyń túri (eger anyqtalsa), sondaı-aq halyqty qorǵaý boıynsha usynystar. Sonymen qatar, jańa derekter túsken saıyn qaıta habarlaý qarastyrylǵan. Aqparatty barlyq múmkin tásildermen, onyń ishinde resmı ınternet-resýrstar men buqaralyq aqparat quraldary arqyly taratý qajet.
Qaýly shyqqannan keıin eki kún ótken soń sot isti qaıta qaraýǵa májbúr boldy. Qujattyń qarar bóliginde qatelik anyqtaldy. Bastapqyda sot aktisinde ákimdik halyqty habardar etý reglamentin "qaıta qarap, bekitýi" kerek delingen. Alaıda keıin sot tujyrymdy túzetip, taraptar "mindetti reglamentti ázirleý jáne bekitý" týraly keliskenin kórsetti. Sot túzetýdiń tehnıkalyq sıpatta ekenin jáne qabyldanǵan sot aktisi men taraptardyń kelisiminiń mánin ózgertpeıtinin atap ótti.
Sot sondaı-aq bekitilgen tatýlasý kelisiminiń mindetti kúshi bar ekenin túsindirdi. Eger onyń sharttary erikti túrde oryndalmasa, qujat atqarý paraǵy negizinde májbúrlep oryndatýǵa usynylýy múmkin.
Qoǵam belsendisi talap aryzyn mamyr aıynda Óskemendegi "Kazsınk" JSHS metalýrgıalyq alańyndaǵy apattan keıin bergen. Sonda kóptegen qala turǵyndary bolǵan oqıǵa týraly resmı aqparatty uzaq ýaqyt almaǵandaryn jáne onyń densaýlyqqa qaýip tóndiretinin túsinbegenderin aıtqan. Dál osy ákimdiktiń jedel habarlaý boıynsha áreketsizdigi SHQO MAÁS-qa berilgen talaptyń negizi boldy.