Reseımen shekarada Qazaqstan aýmaǵyna iri partıa taýyq jumyrtqasyn zańsyz ákelý áreketiniń joly kesildi: 20 tonna ónimi bar júk kóligi elge kirgizilmedi, dep habarlaıdy infohub.kz.
Respýblıka Aýyl sharýashylyǵy mınıstrliginde aıtylǵandaı, oqıǵa Batys Qazaqstan oblysyndaǵy «Syrym» veterınarıalyq baqylaý beketinde bolǵan. Vedomstvo qyzmetkerleri Samara (RF) — Astana baǵytymen kele jatqan júk kóligin tekserý úshin toqtatqan.
Tekserý barysynda 20 tonna taǵamdyq taýyq jumyrtqasyn tasymaldaý zańnamada kózdelgen veterınarıalyq ilespe qujattarsyz júzege asyrylǵany anyqtaldy. Osyǵan baılanysty kólik quraly júkpen birge keri qaıtaryldy. Júrgizýshige qatysty ákimshilik hattama toltyrylyp, aıyppul salyndy.
Tasymaldaýshy ókilderine Qazaqstan men Eýrazıalyq ekonomıkalyq odaqtyń veterınarıalyq zańnamasynyń talaptary túsindirildi.
Aýyl sharýashylyǵy mınıstrliginde 2026 jyldyń 21 sáýirinen bastap alty aı merzimge úshinshi elderden jáne EAEO múshe memleketterinen barlyq kólik túrimen taýyq jumyrtqasyn Qazaqstan aýmaǵyna ákelýge tyıym salynǵanyn eske saldy. Bul sharalar ónimniń ákelinýin retteýge jáne eldiń veterınarıalyq-sanıtarıalyq jáne epızootıalyq turaqtylyǵyn qamtamasyz etýge baǵyttalǵan.