2026 jylǵy jaz mezgilinde aýanyń ortasha temperatýrasy klımattyq normadan 2,15 gradýsqa asyp, bul jaz Qazaqstandaǵy baqylaý tarıhyndaǵy eń ystyq jaz bolyp tirkeldi, dep habarlaıdy infohub.kz saıty.
NUR.KZ agenttiginiń «Qazgıdromet» RMK-ǵa silteme jasap habarlaýynsha, aýa temperatýrasynyń oń aýytqýlary el aýmaǵynyń basym bóliginde baıqalǵan. Jaýyn-shashyn mólsheri klımattyq normadan 7,12 mm-ge kem túsken.
Temperatýranyń eń úlken oń aýytqýlary Aqmola jáne Qaraǵandy oblystarynyń shyǵysynda, Pavlodar oblysynda, sondaı-aq Shyǵys Qazaqstan oblysy men Abaı oblysynyń basym bóliginde tirkelgen.
«Klımattyq normadan eń joǵary oń aýytqý +4 gradýsty qurap, Qaraǵandy oblysyndaǵy Bes-Oba meteostansıasynda tirkeldi», — delingen sınoptıkter habarlamasynda.
Sonymen qatar «Qazgıdromet» derekterine sáıkes, 2026 jylǵy jaz Qazaqstan aýmaǵynda jaýyn-shashynnyń birkelki taralmaýymen erekshelengen.
Buǵan deıin Qazaqstandaǵy shilde aıyndaǵy ystyq birneshe qalada temperatýra maksımýmdaryn jańartqany habarlanǵan. Atap aıtqanda, Shymkentte 111 jyl boıy saqtalǵan rekord jańardy: bir ǵasyr ishinde alǵash ret termometr baǵany 45 gradýstan joǵary kóterildi. Joǵary temperatýra Túrkistan men Almatyda da tirkeldi.
Oǵan deıin Astana turǵyndary sońǵy 34 jyldaǵy eń ystyq kúnderdiń birin bastan ótkergeni, al 2026 jylǵy 23 maýsym sońǵy 85 jyldaǵy eń ystyq kún bolǵany atap ótilgen — sol kúni aýanyń eń joǵary temperatýrasy 36,8 gradýsqa jetken.
Sarapshylardyń pikirinshe, mundaı aýa raıy bolashaqta qalypty jaǵdaıǵa aınalýy múmkin.