Qazaqstanda 25 shilde men 5 tamyz aralyǵynda aqyly bólimge túsýshiler úshin tamyz aıyndaǵy Ulttyq biryńǵaı testileýge (UBT) ótinim qabyldaý bastalady, dep habarlaıdy infohub.kz saıty.
Ótinimdi app.testcenter.kz saıty nemese UTO.kz qosymshasy arqyly berýge bolady. Testileýdiń ózi 10-15 tamyz aralyǵynda ótedi, dep naqtylady Ulttyq testileý ortalyǵy.
Tamyz aıyndaǵy UBT úsh sanattaǵy talapkerlerge arnalǵan. Birinshiden, qaıta tapsyrý úshin: aldyńǵy testileýlerde shekti bal jınaı almaǵandar, sondaı-aq ótken jyldardaǵy shartty túrde qabyldanǵan stýdentter. Ekinshiden, beıinin ózgertý úshin: mamyr-maýsym aılaryndaǵy testileýge qatysýshylar beıindik pánder kombınasıasyn ózgerte alady. Úshinshiden, aýysý úshin: shyǵarmashylyq mamandyqtardan qarapaıym nemese pedagogıkalyq baǵyttarǵa aýysýdy josparlap otyrǵan stýdentter.
Aǵymdaǵy jáne ótken jyldardaǵy mektep jáne kolej túlekteri, qandastar, sondaı-aq shetelde mektep bitirgen qazaqstandyqtar tirkele alady. Ótinim berý kezinde qatysýshylar tapsyratyn pýnktti, kúni men ýaqytyn ózderi tańdaıdy.
Kolej túlekteri óz mamandyǵy boıynsha joǵary oqý ornynda aqyly negizde oqýdy jalǵastyrǵysy keletin bolsa, UBT-syz — ýnıversıtettiń qabyldaý komısıasyndaǵy suhbat nátıjesi boıynsha túse alady.