Qazaqstanda tórt aı ishinde 27 tártiptik jaza alǵan sottalǵanǵa qatysty qylmystyq is toqtatyldy, dep habarlaıdy infohub.kz saıty.
Qylmystyq ister jónindegi kasasıalyq sottyń málimetinshe, birinshi satydaǵy sot pen apelásıalyq saty qazaqstandyqty QR Qylmystyq kodeksiniń 428-babynyń 1-bóligi boıynsha – bas bostandyǵynan aıyrý oryndarynda jazasyn ótep júrgen adamnyń qylmystyq-atqarý (penıtensıarlyq) júıesi mekemeleri ákimshiliginiń zańdy talaptaryna qasaqana baǵynbaýy úshin kináli dep tanydy. Alaıda kasasıalyq sot úkimdi qaıta qarap, qylmystyq quqyq buzýshylyq quramynyń bolmaýyna baılanysty qylmystyq isti toqtatty.
Sottar anyqtaǵandaı, P.-ny qylmystyq jaýapkershilikke tartýǵa negiz bolǵan – mekeme ákimshiligi tórt aı ishinde salǵan 27 tártiptik jaza. Onyń 26-sy sottalǵannyń tártiptik oqshaýlaǵyshta jáne jalǵyz kamerada ustaý kezinde jiberilgen buzýshylyqtarǵa baılanysty bolǵan.
Kasasıalyq sot azamattyń oryndamaǵany úshin jaýapkershilikke tartylǵan mekeme ákimshiliginiń talaptary zańdy bolmaǵan degen qorytyndyǵa keldi. Bul tergeý sottarynyń qaýlylarymen, ýákiletti organdardyń tekserý nátıjelerimen jáne istiń ózge de materıaldarymen rastalǵan.
Sonymen qatar, jazalar sottalǵan adam sálemdemeniń bir bóligin zańsyz alyp qoıýǵa shaǵymdana bastaǵannan keıin qoldanyla bastaǵany, al oǵan deıin onyń minez-qulqynyń ekinshi oń dárejesi men kótermeleýleri bolǵany anyqtaldy.
Bul jaǵdaıda ákimshilik talaptary zańdy bolmaǵandyqtan, al sottalǵannyń áreketteri óz quqyqtaryn qorǵaýǵa baǵyttalǵandyqtan jáne mekemeniń qalypty jumysyn buzbaǵandyqtan, qylmystyq quqyq buzýshylyq quramy joq. Osyǵan baılanysty sot aktileri joıylyp, qylmystyq is toqtatyldy.