Qazaqstandyq ǵalymdardyń aýqymdy zertteýi qaýipsizdik normalary saqtalǵan jaǵdaıda 4G jáne 5G tehnologıalarynyń densaýlyqqa zıany týraly naqty dálelder joq ekenin kórsetti, dep habarlaıdy infohub.kz.
Ǵylymı jáne medısınalyq uıymdardyń mamandary bul tehnologıalardyń adam aǵzasyna áserine arnalǵan 255-ten astam ǵylymı jarıalanymdy, onyń ishinde meta-taldaýlar men júıeli sholýlardy taldady.
Taldaýda: «Halyqaralyq elektromagnıttik qaýipsizdik normalary saqtalǵan kezde 5G tehnologıasynyń adam densaýlyǵyna uzaq merzimdi teris áseri týraly naqty ǵylymı dálelder alynǵan joq», — dep atap kórsetilgen.
Zertteýshiler radıo jıiliktegi sáýlelenýdiń áseri áli de zerttelip jatqanyn, keıbir máseleler ǵylymı pikirtalas týdyryp jatqanyn aıtady.
Qazaqstanda elektromagnıttik óristerdiń deńgeıi sanıtarlyq normatıvtermen retteledi. Halyq úshin gıgıenalyq qaýipsizdik qory bar ruqsat etilgen kórsetkishter belgilengen.
Densaýlyq saqtaý mınıstrliginiń jarıalanymynda: «Belgilengen talaptar saqtalǵan kezde uıaly baılanys munaralarynyń jáne 4G/5G jabdyqtarynyń bolýy olardy halyqtyń densaýlyǵyna qaýipti dep sanaýǵa negiz bolmaıdy», — delingen.
Ǵalymdar yqtımal qaýipter týraly aqparatty áleýmettik jelilerdegi tekserilmegen habarlamalarǵa emes, ǵylymı jáne resmı kózderge súıene otyryp baǵalaýǵa shaqyrdy.