Anomal ystyqta Almaty mańyndaǵy Besaǵash kentinde júzdegen úı sýarý sýynsyz qaldy. Mıllıardtaǵan teńge jumsalǵan jańa júıe máseleni sheshe almady, dep habarlaıdy infohub.kz.

Jergilikti turǵyndardyń aıtýynsha, sýdyń úzilýi 30 jyldan astam ýaqyttan beri jalǵasyp keledi. Ystyqta krandardaǵy sý mezgil-mezgil joǵalady — adamdar baklajka satyp alyp, turmystyq qajettilikteri úshin qor jınaýǵa májbúr.

«Jaz — biz úshin qorqynyshty ýaqyt. Únemi bir másele. Men buǵan deıin bir taz sý jınap qoıdym. Mynaý tur, kún jylytsyn dep. Keshke osy sýmen jýynamyn», — dedi Besaǵash turǵyny Vácheslav Goncharov.

Barlyǵy Besaǵashtyń ońtústik bóliginde 800-ge jýyq úı sýsyz qaldy. Turǵyndardyń aıtýynsha, bárine eski rezervýar sebep.

«Olar bizdiń jınalystardan, sóz sóıleýlerimizden keıin ashamyz dep ýáde berdi (bul birinshi ret emes). Men prokýratýraǵa hat joldaǵannan keıin, olar kelip: „Qosylyńdar, «Ońtústik» jobasy júzege asty, rezervýar jumys isteıdi“ dedi. Shyn máninde, bul metal úıindisi, onda eshteńe jumys istemeıdi», — dep nalıdy kent turǵyny Aıman Sabdenova.

Jańa rezervýar Besaǵashta bir jyl buryn paıda boldy. Qujattar boıynsha ol jeltoqsan aıynda paıdalanýǵa berilgen jáne dál osy rezervýar kópten beri kele jatqan máseleni sheshýi kerek edi. Búkil sý júıesine shamamen bes mıllıard teńge jumsaldy. Degenmen sý áli de jetispeıdi.

Ákimdik ókilderiniń aıtýynsha, eski rezervýar júktemege tótep bere almaıdy. Turǵyndardan bólek, odan sýdy egistikterdi sýarýǵa, sondaı-aq meıramhanalar men dúkender de paıdalanady. Qazir júıe tekserildi. Úı ıeleri óz ýchaskelerin jańa jelilerge qosýy kerek.

«Qazir másele turǵyndardan bolyp tur. Olardyń árqaısysynyń qorshaýyna abonenttik tútikter tartyldy. Endi árkim úıine qubyr tartýy kerek. Qazirgi problema tek osynda. Keshe keshke jańa rezervýardan eski rezervýarǵa sý berdik, óıtkeni halyq áli tolyq jańa sýǵa aýysqan joq. Túni boıy sýdy óshirmedik. Qazir de barlyǵynda sý bar», — dedi Besaǵash aýyldyq okrýginiń ákimi Ernar Júnisov.

Bılik ókilderiniń sendirýinshe, barlyq úı jańa júıege qosylǵannan keıin sýdyń úzilýi toqtaıdy.