Búgin Semeı qalasynda «EcoForest» tolyq sıkldi ekologıalyq aǵash óńdeý ónerkásiptik parkiniń irgetasyn qalaý rásimi ótti, dep habarlaıdy infohub.kz saıty. Saltanatty sharaǵa Abaı oblysynyń ákimi Berik Ýálı men «Xinjiang Chunzheng Aosi Trading Co., Ltd.» kompanıasynyń bas dırektory Chjan Lıkaı qatysty.
Oblys ákimi quttyqtaý sózinde bul joba óńirdiń ónerkásiptik ári ınvestısıalyq áleýetin arttyryp, jańa jumys oryndaryn ashatynyn atap ótti. «Memleket basshysy Qasym-Jomart Kemeluly Toqaev ınvestısıa tartýdy ekonomıkalyq saıasattyń basym baǵyttarynyń biri retinde únemi aıtyp keledi. Abaı oblysynda ınvestorlarǵa qolaıly jaǵdaı jasaýǵa, óndiristik ınfraqurylymdy damytýǵa erekshe kóńil bólinýde. Búgingi joba – halyqaralyq seriktestiktiń naqty nátıjesi. Byltyr Qytaıda ótken «Úlken Altaı» konferensıasynda bastalǵan kelissózderdiń arqasynda bul bastama júzege asyp otyr. Joba óńirlik úılestirý keńesinde qoldaý taýyp, qajetti memlekettik qoldaý sharalary kórsetilip, jer ýchaskeleri berildi. Bul óńirdiń ónerkásiptik jáne ekologıalyq damýyna eleýli úles qosyp, zamanaýı tehnologıalar engizýge, aǵash shıkizatyn qaldyqsyz paıdalanýǵa múmkindik beredi», – dedi Berik Ýálı.
Joba órtten zardap shekken jáne sanıtarlyq kesýge jatatyn aǵashty tıimdi óńdeýge, qosylǵan quny joǵary ónim shyǵarýǵa, óndiris qaldyqtaryn qaıta paıdalanýǵa baǵyttalǵan. Jalpy ınvestısıa kólemi 67 mıllıon AQSh dollary. Semeıde 50 gektar aýmaqta tolyq sıkldi ındýstrıalyq-ekologıalyq aǵash óńdeý parki, al Borodýlıha aýdanyndaǵy Mıhaılovka aýylynda 4 gektar jerde aǵashty bastapqy óńdeý kesheni salynady.
Semeıdegi keshende jylyna 2 mıllıon tekshe metrge deıin aǵash shıkizaty óńdelip, 800–900 myń tekshe metr daıyn ónim shyǵarylady. Keshen quramyna jylyna 250–300 myń tekshe metr qýattylyqtaǵy E0, E1 jáne ENF klasty taqtalar zaýyty, dál sondaı qýattylyqtaǵy OSB jáne FOSB taqtalary zaýyty, jylyna 100 myń tekshe metrge deıin daıyn ónim shyǵaratyn jıhaz modýli, termıalyq modıfıkasıalanǵan jáne antıseptıkalyq óńdelgen aǵash óndirisi, eýropalletter, aǵash pelletteri men bıootyn zaýyty, organıkalyq tyńaıtqyshtar zaýyty, qurylys-logıstıkalyq ortalyq jáne ınjenerlik ınfraqurylym kiredi. Borodýlıhadaǵy keshende jylyna 500 myń tekshe metrge deıin aǵash óńdelip, 120–150 myń tonna pellet óndiriledi. Bul alańda shıkizatty qabyldaý, suryptaý, qabyǵyn arshý, aralaý, keptirý, usaqtaý jáne tereń óńdeýge daıyndaý júrgizilip, daıyndalǵan aǵash Semeıge jiberiledi.
Joba aıasynda zamanaýı avtomattandyrylǵan óndiris iske qosylyp, aǵash shıkizaty qaldyqsyz tehnologıamen tereń óńdeledi. Kásiporyndarda OSB jáne FOSB panelderi, MDF, aǵash-jańqaly taqtalar, fanera, shpon, ınjenerlik panelder, jıhaz daıyndamalary, aǵash pelletteri, bıootyn jáne organıkalyq tyńaıtqyshtar óndiriledi. Tolyq qýatyna shyqqanda 900-ge jýyq turaqty jumys orny ashylyp, ónim Qazaqstan naryǵymen qatar Ortalyq Azıa, Eýropa, Japonıa, Ońtústik Koreıa jáne basqa halyqaralyq naryqtarǵa eksporttalady.