Abaı oblysynda shamamen 5 myń gektar jerdi sharpyǵan tabıǵı órt tolyq sóndirildi. Bul týraly Qazaqstannyń Tótenshe jaǵdaılar mınıstrliginiń baspasóz qyzmeti habarlady, dep jazady infohub.kz saıty.
Vedomstvonyń málimetinshe, qurǵaq shóp pen butalar Tarbaǵataı aýyldyq okrýginiń Qazankemir ýchaskesinde — taýly jáne qoljetimsiz jerde tutanǵan. Dál osy beder órt sóndirýshilerdiń jumysyn aıtarlyqtaı qıyndatty.
Jalyn shamamen 5 000 gektar aýmaqqa taraldy. Tótenshe jaǵdaılar mınıstrliginiń naqtylaýynsha, órtti sóndirý barysynda «Qazavıaspas» aksıonerlik qoǵamynyń jáne Qazaqstan Respýblıkasy Ulttyq qaýipsizdik komıtetiniń avıasıalyq qyzmetiniń ushaqtarymen jalpy kólemi 71 tonna sýdy 26 ret tastaý júzege asyryldy.
«Órtti sóndirýge Abaı oblysy men Shyǵys Qazaqstan oblysynyń TJD bólimsheleri, jergilikti atqarýshy organdar, orman sharýashylyǵy qyzmetkerleri, sondaı-aq «Qazavıaspas» AQ jáne QR UQK ushaqtary jumyldyryldy», — delingen vedomstvo málimdemesinde.
Zardap shekkender joq.
Buǵan deıin Abaı oblysynyń Aıagóz aýdanynda, Tarbaǵataı aýyldyq okrýginiń Qazankemir ýchaskesinde taýly, qoljetimsiz jerde qurǵaq shóp pen butalardyń tutanǵany habarlanǵan. Órt «Tarbaǵataı» memlekettik ulttyq tabıǵı parkiniń aýmaǵyna taraldy.