Abaı oblysynda 30 jastaǵy áıel bank shotyn úshinshi tulǵalarǵa bergeni úshin — ıaǵnı dropperlik jasaǵany úshin sot aldynda jaýap berdi. Shotqa qol jetkizgeni úshin ol 40 myń teńge alǵan, alaıda sońynda memleketke odan áldeqaıda kóp tóleýge májbúr boldy, dep habarlaıdy infohub.kz saıty.
İshki ister mınıstrliginiń aqparattyq medıaportalynyń málimetinshe, 1 naýryzda Kókpekti aýdanynda 30 jastaǵy áıel Instagram jelisinde bank shotyn jalǵa berý arqyly aqsha tabý múmkindigi týraly habarlandyrýdy kórgen. Usynysqa qyzyǵyp, ol habarlandyrýdaǵy silteme arqyly Telegram-ǵa ótken.
Onda onymen belgisiz bir adam baılanysqan. Hat almasý barysynda oǵan aqsha aýdarymdaryn júzege asyrý úshin óz bank shotyn úshinshi tulǵalardyń paıdalanýyna berýdi usynǵan. Ol úshin aqshalaı syıaqy ýáde etilgen.
Áıel kúmándi operasıalarǵa qatysýdan bas tarta alatynyna qaramastan, usynysqa kelisip, bank shotyn úshinshi tulǵalardyń paıdalanýyna bergen. 2026 jylǵy 2-9 naýryz aralyǵynda onyń bank shotyna ártúrli adamdardan aqsha túsip otyrǵan. Bank shotyn paıdalanýǵa bergeni úshin áıel 40 myń teńge syıaqy alǵan.
Sotqa deıingi tergeý nátıjeleri boıynsha Kókpekti aýdanynyń tergeý bóliminiń tergeýshisi qylmystyq isti sottyń qaraýyna jibergen. Sot onyń áreketterin Qazaqstan Respýblıkasy Qylmystyq kodeksiniń bank shotyna, tólem quralyna nemese sáıkestendirý quralyna zańsyz qol jetkizýdi berý, berý jáne alý, sondaı-aq tólemderdi jáne (nemese) aqsha aýdarymdaryn zańsyz júzege asyrý úshin jaýapkershilikti kózdeıtin normasy boıynsha saralaǵan.
Jaza taǵaıyndaý kezinde sot kináni tolyq moıyndaý, jasaǵan isine shyn júrekten ókiný, sondaı-aq kámeletke tolmaǵan balalarynyń asyraýynda bolýyn jeńildetetin mán-jaılar retinde eskergen. Osyny eskere otyryp, oǵan 20 aılyq eseptik kórsetkish mólsherinde, ıaǵnı 86 500 teńge aıyppul túrindegi jaza taǵaıyndalǵan.
Sonymen qatar, odan Jábirlenýshilerge ótemaqy qoryna 5 aılyq eseptik kórsetkish (21 625 teńge) mólsherinde májbúrli tólem óndirilgen.