Jarma aýdandyq sotynda jergilikti turǵynnyń óz tanysynyń ıntım fotosyn taratqany týraly is qaraldy, dep habarlaıdy infohub.kz saıty.
Baspasóz qyzmetiniń málimetinshe, er adam burynǵy tanysynyń uıaly telefonyn taýyp alǵan. Ony zańdy ıesine qaıtarmaı, telefonǵa kirip, 67 fotosýretti óz telefonyna kóshirip alǵan. Bul sýretterde jábirlenýshi jalańash nemese ishkıimmen túsken. Sondaı-aq, ol jábirlenýshiniń jeke hat-habarlarymen tanysqan.
«Ol qyzǵanyshtan jábirlenýshiniń eki tanysyna onyń kelisiminsiz atalǵan fotosýretterdi jiberip, jeke ómiriniń qupıasyn quraıtyn málimetterdi taratqan», — delingen sot habarlamasynda.
Sotta ol kinásin tolyq moıyndap, istegenine ókingen. Sonymen qatar, taraptar tatýlasyp, jábirlenýshi er adamdy keshirgenin jáne bas bostandyǵynan aıyrýmen baılanysty emes jaza taǵaıyndaýdy suraǵanyn málimdegen.
Er adam kináli dep tanylyp, 3 jylǵa shartty túrde bas bostandyǵynan aıyrý jazasy taǵaıyndaldy.