Abaı oblysynda úsh jańartylǵan temirjol vokzaly paıdalanýǵa berildi, dep habarlaıdy infohub.kz saıty.
Memleket basshysy Qasym-Jomart Toqaevtyń tapsyrmasyna jáne «Qazaqstan temir joly» ulttyq kompanıasynyń vokzal ınfraqurylymyn jańǵyrtý baǵdarlamasyna sáıkes elimizde 124 vokzaldy jańartý bastaldy, onyń ishinde Abaı oblysynda 10 vokzal bar. Búgin Jarma aýdanyndaǵy Úshbıik, Jarma jáne Shar stansıalarynda jańartylǵan vokzaldar ashyldy. Saltanatty sharaǵa oblys ákimi Berik Ýálı qatysty.
Jańǵyrtý jumystary «Qazaqstan temir joly» ulttyq kompanıasynyń tapsyrysy boıynsha Qazaqstan Respýblıkasy Úkimetiniń, kólik mınıstrliginiń, «Samuryq-Qazyna» AQ jáne Abaı oblysy ákimdiginiń qoldaýymen júrgizildi.
Óńir basshysy jańartylǵan vokzaldardyń turǵyndar úshin mańyzdylyǵyn atap ótti. «Temir jol – elimizdiń eldi mekenderin baılanystyratyn strategıalyq mańyzy bar kólik júıeleriniń biri. Sondyqtan onyń ınfraqurylymyn jańartý jáne jolaýshylarǵa qolaıly jaǵdaı jasaý – ýaqyt talabynan týyndap otyrǵan mańyzdy mindet. Memleket basshysy Qasym-Jomart Kemeluly Toqaev eldiń kólik-logıstıkalyq áleýetin arttyrýǵa, temirjol ınfraqurylymyn jańǵyrtýǵa jáne jolaýshylarǵa qyzmet kórsetý sapasyn jaqsartýǵa erekshe kóńil bólýde. Vokzaldardy zamanaýı talaptarǵa saı jańartý turǵyndardyń suranysyna jaýap beretin mańyzdy sheshim boldy dep esepteımiz. Osy oraıda oblys turǵyndary atynan osy mańyzdy jobalardy júzege asyrýǵa úles qosqan barlyq azamattar men mamandarǵa shynaıy alǵysymdy bildiremin. Búgin mańyzdy kólik joldarynyń toǵysqan jerinde ornalasqan Jarma aýdanynda birden úsh jańa vokzal ashyp otyrmyz. Olar jolaýshylarǵa qolaıly jaǵdaı jasap, Jarma aýdanynyń odan ári damýyna yqpal etsin! Barshańyzdy osy aıtýly oqıǵamen shyn júrekten quttyqtaımyn!» – dedi Berik Ýálı.
Úsh stansıa da óńirdiń kólik júıesinde erekshe oryn alady. Olar arqyly Semeı – Astana, Novosıbırsk – Almaty, Pavlodar – Almaty, Semeı – Qyzylorda jáne Óskemen – Almaty baǵyttary boıynsha jolaýshylar poıyzdary júredi.
Shar qalasyndaǵy temirjol vokzaly 1982 jyly salynǵan. Jańǵyrtý barysynda ǵımarattyń jalpy aýdany 413 sharshy metrden 654 sharshy metrge ulǵaıdy. Bir qabatty nysan eki qabatty boldy, ishki bólmeler tolyǵymen jańartyldy. Lıft ornatylyp, kútý jáne jolaýshylarǵa qyzmet kórsetý aımaqtary qajetti jabdyqtarmen jaraqtandyryldy. Sonymen qatar, vokzalda buryn bolmaǵan uzyndyǵy 716 metr araldyq platforma salyndy.
Úshbıik stansıasyndaǵy temirjol vokzaly 1995 jyly salynǵan. Nysanǵa sońǵy kúrdeli jóndeý 2012 jyly júrgizilgen. Jańǵyrtý nátıjesinde ǵımarattyń jalpy aýdany 83,7 sharshy metrden 201,1 sharshy metrge deıin ulǵaıdy. İshki bólmeler jańartylyp, kútý jáne jolaýshylarǵa qyzmet kórsetý bólmeleri qajetti jabdyqtarmen jaraqtandyryldy.
Jarma stansıasyndaǵy vokzal ǵımaraty 1996 jyly salynǵan. Tehnıkalyq tekserý nátıjeleri boıynsha eski ǵımarat tolyǵymen buzylyp, ornyna jańa vokzal salyndy. Nysannyń jalpy aýdany 217 sharshy metrden 347,7 sharshy metrge ulǵaıdy. İshki bólmeler qaıta jabdyqtalyp, kútý jáne jolaýshylarǵa qyzmet kórsetý aımaqtary zamanaýı talaptarǵa sáıkestendirildi. Sondaı-aq, 650 metr perron jańartyldy.
Úsh vokzalda da jolaýshylardyń qaýipsizdigi men jaılylyǵyna, sondaı-aq erekshe qajettilikteri bar azamattar úshin qoljetimdi orta qurýǵa erekshe kóńil bólindi.