Abaı oblysynda merdiger uıymnan aýdandyq mańyzdaǵy avtomobıl jolyn jóndeý merzimin buzǵany úshin 12 mln teńgeden astam aıyppul óndirilip alyndy, dep habarlaıdy infohub.kz saıty.
Abaı oblysy sottarynyń resmı Telegram-arnasynda jazylǵandaı, Aıagóz aýdandyq soty Aıagóz aýdanynyń turǵyn úı-kommýnaldyq sharýashylyq, jolaýshylar kóligi, avtomobıl joldary jáne turǵyn úı ınspeksıasy bóliminiń aıyppul óndirý týraly azamattyq isin qarady.
Memlekettik mekeme men merdiger uıym arasynda Aqtoǵaı — Peresheek aýdandyq mańyzdaǵy avtomobıl jolyn aǵymdaǵy shuńqyr jóndeýden ótkizý jumystaryn oryndaýǵa shart jasalǵan.
Merdiger jumysty 2025 jylǵy 30 qazanǵa deıin aıaqtaýǵa mindettengen. Sharttyń jalpy somasy 369,5 mln teńgege jýyq boldy. Oryndalǵan jumys kólemi úshin barlyǵy 50 mln teńge aýdarylǵan.
Sot anyqtaǵandaı, merdiger jumysty aıaqtamaǵan jáne ony qabyldaý aktisi boıynsha tapsyrys berýshige tapsyrmaǵan, osylaısha shart talaptaryn buzǵan. Memlekettik mekeme sotqa 2025 jylǵy 31 qazannan 8 jeltoqsanǵa deıingi merzimde oryndalmaǵan mindettemeler mólsheri men shart talaptaryna sáıkes eseptelgen 12 mln teńgeden sál astam aıyppuldy óndirý talabymen júgingen.
Jaýapkerdiń pikirinshe, mindettemelerdi oryndaý merzimi memlekettik satyp alý veb-portalynda ornalastyrylǵan qosymsha kelisimmen uzartylǵan. Sot merdiger uıym silteme jasaǵan qujat taraptar qol qoımaǵan, tek memlekettik satyp alý veb-portalynda jasalǵanyn atap ótti. Demek, mundaı qujat qoldanystaǵy sharttyń talaptaryn, onyń ishinde mindettemelerdi oryndaý merzimderin ózgerte almaıdy.
Aıagóz aýdandyq sotynyń sheshimimen talap-aryz tolyq qanaǵattandyryldy. Jaýapkershiligi shekteýli seriktestikten 12 mln teńgeden astam aıyppul jáne memleket kirisine memlekettik baj óndirildi.
Sot sheshimi zańdy kúshine endi.