Qazaqstan premer-mınıstri Oljas Bektenov orman órtin sóndirýdi úılestirý úshin TJM jáne Ekologıa mınıstrliginiń basshylaryn Abaı oblys ortalyǵyna shuǵyl jiberdi, dep habarlaıdy infohub.kz saıty.
Premer-mınıstrdiń buıryǵy boıynsha, aımaqqa tótenshe jaǵdaılar mınıstri Shyńǵys Arınov jáne ekologıa jáne tabıǵı resýrstar mınıstri Erlan Nysanbaev dereý jolǵa shyqty. Olarǵa «Semeı ormany» rezervaty aýmaǵyndaǵy órtti joıý jumystaryn basqarý tapsyryldy.
«Órttiń aldyn alý jáne jaqyn mańdaǵy eldi mekenderdi qorǵaý sharalaryn kúsheıtý tapsyryldy. 16 shilde saǵat 16:00-degi jaǵdaı boıynsha órt sóndirýge 400-den astam adam jáne 100-ge jýyq tehnıka jumyldyryldy. 100 tonnadan astam sý tógildi», — dep atap ótti úkimette.
Jedel shtabtyń jumysy úkimet basshysynyń jeke baqylaýynda.
Buǵan deıin 16 shilde kúni tańerteń Abaı oblysynyń «Semeı ormany» aýmaǵynda orman órti shyqqany habarlanǵan bolatyn. Ony sóndirýge jerdegi tehnıka men avıasıa jumyldyryldy. Keıin polısıa «DosbolLike» balalar lagerinen órtke baılanysty 190 bala men 20 qyzmetker evakýasıalanǵanyn naqtylady. Polısıa qyzmetkerleri TJ aımaǵynda qaýipsizdikti qamtamasyz etýdi jalǵastyrýda.