16 shildede tutanǵan «Semeı ormany» rezervatyndaǵy orman órti 18 shildede saǵat 9:45-te oqshaýlandy, dep habarlaıdy infohub.kz.
Ekologıa mınıstrliginiń habarlaýynsha, órtti joıýǵa «Semeı ormany» jáne «Ertis ormany» memlekettik orman tabıǵı rezervattarynyń qyzmetkerleri, «Qazavıaormanqorǵaý» RMK kúshteri men quraldary, sondaı-aq TJM, İİM, Qorǵanys mınıstrligi, UQK jáne jergilikti atqarýshy organdardyń bólimsheleri jumyldyrylǵan.
Vedomstvonyń naqtylaýynsha, órtti sóndirýge barlyǵy 769 adam, 191 birlik jerústi tehnıkasy jáne 8 tikushaq tartylǵan. Órt sóndirý barysynda avıasıa 319 ret sý shashyp, órt oshaǵyna 709 tonna sý jetkizilgen.
Buǵan deıin tabıǵı órtke baılanysty «DosbolLike» balalar lagerinen 190 bala men 20 qyzmetker evakýasıalanǵany habarlanǵan bolatyn. Premer-mınıstr Oljas Bektenov oqıǵa ornyna shuǵyl túrde mınıstrlerdi jiberdi. Aldyńǵy kúni órt sóndirýshiler ashyq janýdy joıǵan edi.