Abaı oblysyndaǵy «Semeı ormany» rezervaty aýmaǵynda iri tabıǵı órt áli de jalǵasýda. Premer-mınıstr Oljas Bektenovtiń tapsyrmasy boıynsha aımaqqa tótenshe jaǵdaılar mınıstri men ekologıa mınıstri ushyp bardy, dep habarlaıdy infohub.kz.
Órt «Semeı ormany» memlekettik orman tabıǵı rezervatynyń Borodýlıha fılıalynda shyqty. Ony sóndirýge TJM bólimsheleri, orman sharýashylyǵy qyzmetkerleri, polısıa, sondaı-aq TJM, Qorǵanys mınıstrligi jáne UQK avıasıasy jumyldyryldy. Órttiń taralý qaýpine baılanysty qutqarýshylar polısıa jáne ákimdikpen birlesip, «Dos-bolLike» balalar lagerine aldyn ala evakýasıa jasady. Semeı qalasyna 220 adam, onyń ishinde 190 bala jáne 30 qyzmetker shyǵaryldy. Sońǵy derekter boıynsha, Kamyshenka aýylyna tóngen qaýip seıildi.
Aldyn ala baǵalaý boıynsha, órt shamamen 60 gektar ormandy shalǵan. Ony sóndirýge 600-ge jýyq adam, 148 jerústi tehnıkasy jáne jeti tikushaq jumyldyrylǵan. Avıasıa 81 ret sý shashyp, jalpy kólemi 89 tonna sý tógildi. Kúshterdi kúsheıtý maqsatynda órt aımaǵyna Abaı oblysynan, Shyǵys Qazaqstan jáne Pavlodar oblystarynan, sondaı-aq Astanadan qosymsha TJM bólimsheleri keldi. Operasıaǵa «Ertis Ormany» kásiporny men TJM áskerı bólimi de qosyldy.
Polısıa qaýipti aımaqqa kire beristerdi jaýyp, arnaıy tehnıkanyń ótýin qamtamasyz etip, jergilikti turǵyndardyń múlkin kúzetýde. TJM jedel shtaby barlyq qyzmetterdiń jumysyn úılestirýde. Mınıstrliktiń habarlaýynsha, mamandar jerden jáne áýeden órtti oqshaýlaý jumystaryn jalǵastyrýda.