Abaı oblysynyń Jarma aýdandyq sotynda aldyn ala sóz baılasý arqyly birneshe adam bolyp bóten múlikti urlaýǵa áreket jasady dep aıyptalǵan eki adamǵa qatysty qylmystyq is qaraldy. Sot olardy qylmystyq jaýapkershilikten bosatty, dep habarlaıdy infohub.kz saıty.
Abaı oblysy sottarynyń resmı Telegram-arnasynda jarıalanǵan aqparatqa sáıkes, is materıaldary boıynsha fıgýranttar uıymǵa tıesili 3700 lıtr dızel otynyn zańsyz ıemdenýge áreket jasaǵan. Alaıda olardyń áreketin kúzet qyzmetiniń qyzmetkerleri toqtatqandyqtan, qylmystyq oılaryn aıaǵyna deıin jetkize almaǵan.
Sottalýshylardyń áreketi ózine senip tapsyrylǵan bóten múlikti ıemdený nemese ysyrap etýge áreket jasaý dep saralandy. Basty sot talqylaýy barysynda jábirlenýshi tarap pen er adamdar tatýlasqandyqtaryn málimdep, keltirilgen zalal tolyq ótelgenin kórsetti jáne medıasıa tártibimen qylmystyq isti toqtatýdy surady.
Sot is materıaldaryn zertteı kele, kináni moıyndaýdy, keltirilgen zalaldyń tolyq ótelýin, jábirlenýshi tarappen tatýlasýdy jáne medıatıvtik kelisim jasalǵanyn eskerdi.
Osy mán-jaılardy nazarǵa ala otyryp, sot QR QK 68-babynyń 1-bóligin qoldaný úshin zańda kózdelgen negizder bar degen qorytyndyǵa keldi.
Sot qaýlysymen sottalýshylarǵa qatysty qylmystyq is taraptardyń tatýlasýyna baılanysty toqtatylyp, olar qylmystyq jaýapkershilikten bosatyldy.
Sondaı-aq sot is boıynsha zattaı dáleldemelerge qatysty tıisti sheshim qabyldady.
Budan bólek, jábirlenýshi taraptyń azamattyq talaby taraptardyń tatýlasýyna baılanysty toqtatyldy. Sot qaýlysy zańdy kúshine engen joq.