Abaı atyndaǵy Qazaq ulttyq opera jáne balet teatry Aspendostaǵy antıkalyq teatr sahnasynda Aram Hachatýránnyń «Spartak» baletin usyndy. Bul týraly infohub.kz saıty habarlaıdy.
Ataqty Aspendos antıkalyq teatry qoıylymǵa dekorasıa boldy. Eki myń jylǵa jýyq tarıhy bar trıbýnalardy sol keshi qazaqstandyq trýppanyń qoıylymyn tamashalaǵan kórermenderge toltyrdy.
Qazaqstan Respýblıkasy Mádenıet jáne aqparat mınıstrliginiń málimetinshe, «Spartak» qoıylymyn shamamen 30 myń adam tamashalady. Abaı atyndaǵy teatr Túrkıanyń Memlekettik opera jáne balet teatrlary bas basqarmasynyń shaqyrýymen festıválge keldi.
«Spartak» horeograf Zaýrbek Raıbaevtyń qoıylymynda usynyldy. Basty partıalardy Arhat Ashırbek, Aıman Egısbaeva, Syrym Aıýpov jáne Janel Týkeeva oryndady.
Spektáklge sondaı-aq teatrdyń balet ártisteri men Qazaqstannyń eńbek sińirgen qaıratkeri Nurjan Baıbýsınovtiń basqarýyndaǵy sımfonıalyq orkestri qatysty.
Teatr bizdiń dáýirimizdiń II ǵasyrynda, Rım ımperıasy tusynda salynǵan. Ol búginge deıin saqtalyp, qazir konsertter men teatr qoıylymdaryn ótkizetin alań retinde paıdalanylady.
Buǵan deıin QazUOB ártisteri trýppa ejelgi qalaǵa bet alǵanda Stambýl áýejaıynda performans uıymdastyrǵan edi.