Abaı oblysyndaǵy «Semeı ormany» rezervatynyń aýmaǵynda iri orman órti bolyp jatyr. Premer-mınıstr Oljas Bektenovtiń tapsyrmasy boıynsha Tótenshe jaǵdaılar mınıstri jáne Ekologıa mınıstri shuǵyl túrde aımaqqa attandy, dep habarlaıdy infohub.kz.
Órt «Semeı ormany» memlekettik orman tabıǵı rezervatynyń Borodýlıha fılıalynda shyqqan. Órtti sóndirýge TJM bólimsheleri, orman sharýashylyǵy qyzmetkerleri, polısıa, sondaı-aq TJM, Qorǵanys mınıstrligi jáne Ulttyq qaýipsizdik komıtetiniń avıasıasy jumyldyryldy.
Órttiń taralý qaýpine baılanysty qutqarýshylar polısıa jáne ákimdikpen birlesip «Dos-bolLike» balalar lagerinen aldyn ala evakýasıa júrgizdi. Barlyǵy Semeıge 220 adam, onyń ishinde 190 bala jáne 30 lager qyzmetkeri jetkizildi. Sońǵy derekter boıynsha, Kamyshenka aýylyna tóngen qaýip joıyldy.
Aldyn ala málimetter boıynsha, órt shamamen 60 gektar ormandy alyp jatyr. Órtpen kúreske 600-ge jýyq adam, 148 birlik jer ústi tehnıkasy jáne jeti tikushaq jumyldyryldy. Avıasıa 89 tonna sýdy 81 ret tógip úlgerdi. Topty kúsheıtý úshin aımaqqa Abaı oblysynan, Shyǵys Qazaqstan jáne Pavlodar oblystarynan, sondaı-aq Astanadan qosymsha TJM bólimsheleri keldi. Operasıaǵa «Ertis Ormany» kúshteri men TJM áskerı bólimi de qosyldy.
Polısıa qaýipti aımaqqa kiretin joldardy jaýyp, arnaıy tehnıkanyń ótýin qamtamasyz etip, turǵyndardyń múlkin kúzetýde. TJM jedel shtaby barlyq qyzmetterdiń jumysyn úılestirip otyr. Qazirgi ýaqytta mamandar órtti jerden jáne áýeden oqshaýlaý jumystaryn jalǵastyrýda.