Almatyda Abaı dańǵylynyń Úlken Almaty aınalma avtomobıl jolyna (BAQAD) deıingi jalǵasy bıyldyń sońyna deıin ashylady. Qurylys daıyndyǵy shamamen 50% quraıdy, dep habarlaıdy infohub.kz saıty.
Jumys sapary barysynda qala ákimi Darhan Satybaldy mundaı mindet qoıdy. Ol radıaldy joldar – Abaı jáne Rysqulov dańǵyldary men Saın kóshesiniń qurylys barysymen tanysty. Bul joldar qalany BAQAD-pen qosady.
Qazirgi tańda nysandardyń qurylys daıyndyǵy shamamen 50% quraıdy. Aqsaı ózeni arqyly ótetin kópirler, BAQAD jáne temirjol joldary arqyly ótetin jol ótkelderi salynýda. Jer ýchaskelerin satyp alý jumystary da jalǵasýda. Abaı dańǵyly boıynsha 82 ýchaskeniń 71-i, Rysqulov dańǵyly boıynsha 190 ýchaskeniń 172-si satyp alyndy, al Saın kóshesi boıynsha bul rásim tolyq aıaqtaldy.
«Ótken jyly oblys aýmaǵyndaǵy jer ýchaskelerin qala búdjeti esebinen tolyq satyp alyp, BAQAD-qa deıingi joldardy ózimiz aıaqtaý týraly sheshim qabyldadyq. Barlyq jobalar bizge berildi, qazir olarǵa túzetýler engizilýde, alaıda jumystar qatar júrip jatyr», – dedi Darhan Satybaldy.
Ákim qurylysty qarjylandyrý qarastyrylǵanyn, merdiger uıymdar belgilengenin atap ótti. «Qurylysqa qarjy qarastyrylǵan, merdiger uıymdar bar. Abaı dańǵyly men Saın kóshesiniń jalǵasy arqyly BAQAD-qa deıingi joldy bıyldyń ózinde ashýdy mindettep otyrmyn», – dedi ol.
Ákimniń aıtýynsha, bul jobalar Almaty aglomerasıasynyń kólik baılanysyn jaqsartyp, kire beris magıstraldaryndaǵy júktemeni azaıtady. Bolashaqta Almatyny BAQAD-pen alty radıaldy magıstral baılanystyrady. Abaı, Rysqulov dańǵyldary men Saın kóshesinen bólek, Tilendıev, Aqan Seri kósheleri men Soltústik aınalma jolynyń jalǵasy boıynsha da jumystar júrip jatyr.