Abaı oblysynda memleketke qaıtarylǵan aktıvter esebinen qarjylandyrylatyn aýqymdy áleýmettik jobalar jalǵasyp jatyr. Jalpy ınvestısıa kólemi 50 mlrd teńgeden asady, dep habarlaıdy infohub.kz.
Abaı oblysy prokýratýrasynyń málimetinshe, óńirde jalpy quny 50 mlrd teńgeden asatyn 26 áleýmettik mańyzy bar joba iske asyrylýda.
«Eń mańyzdy jobalardyń biri – Semeıdegi Arnaýly áleýmettik qyzmet kórsetý ortalyǵynyń jańa korpýsynyń qurylysy. Nysannyń quny 2,6 mlrd teńgeni qurady. Ǵımarat paıdalanýǵa berilgennen keıin psıhonevrologıalyq aýrýlary bar adamdar úshin oryn tapshylyǵy tolyǵymen joıylyp, arnaýly áleýmettik qyzmet alý kezegi aıtarlyqtaı qysqardy», – dedi prokýratýra ókilderi.
Taǵy bir nysan Aıagóz aýdanynda paıdalanýǵa berildi: quny 250 mln teńge bolatyn magnıtti-rezonansty tomografıa apparatyn ornalastyrýǵa arnalǵan qosymsha ǵımarat. «Jańa dıagnostıkalyq keshenniń arqasynda birneshe aýdannyń turǵyndary basqa óńirlerge barmaı-aq zamanaýı joǵary tehnologıalyq medısınalyq kómekke qol jetkizdi», – dep túsindirdi vedomstvo.
Qosymsha bilim berýdi damytýǵa qosqan eleýli úles – Semeıdegi Oqýshylar saraıynyń qurylysy (7,6 mlrd teńge). Jańa ortalyq 1500 balaǵa eseptelgen, munda sport, júzý, robototehnıka, avıamodeldeý, aqparattyq tehnologıalar jáne basqa da baǵyttarmen aınalysýǵa jaǵdaı jasalǵan. Qazir bılik aınalma joldyń janynda ornalasqan nysanǵa qaýipsiz kireberis joldar men jaıaý júrginshiler ınfraqurylymyn salý máselesin qarastyryp jatyr.
Prokýratýra qalǵan nysandardyń qurylysy men iske asyrylýy turaqty baqylaýda ekenin atap ótti. Qaıtarylǵan aktıvterdi paıdalaný áleýmettik ınfraqurylymnyń damýyn jedeldetýge jáne Abaı oblysy turǵyndary úshin sapaly medısınalyq, bilim berý jáne áleýmettik qyzmetterdiń qoljetimdiligin arttyrýǵa múmkindik beredi.