Abıdostan tabylǵan súıek qaldyqtaryna júrgizilgen sot-medısınalyq saraptama ejelgi mysyr bıleýshileriniń qyzmetshileri ádeıi óltirilgen bolýy múmkin ekenin kórsetti, dep jazady The Guardian. Perdú ýnıversıtetiniń bıoarheology Rozalın Kempbell Abıdostaǵy Ýmm el-Kaab patshalyq nekropolinen tabylǵan, jasy shamamen 5000 jylǵa jýyqtaıtyn bas súıekterdi zerttedi, dep habarlaıdy infohub.kz saıty.
Kembrıdj ýnıversıtetiniń Dakvort koleksıasynda saqtalǵan súıek qaldyqtaryna jasalǵan sot saraptamasynyń nátıjeleri Frontiers in Environmental Archaeology jýrnalynda jarıalandy. Ǵalymdardyń jumysy Ejelgi Mysyrdyń Birinshi áýleti bıleýshileriniń ǵuryptyq tájirıbelerine jańasha qaraýǵa múmkindik beredi.
Zertteý barysynda mysyrtanýshy Flınders Pıtrı shamamen bir ǵasyr buryn alǵash qazba jumystaryn júrgizgen 46 bas súıektiń 18-inde (shamamen 39%) ólim aldyndaǵy jaraqattar anyqtaldy. Súıekterdegi syzyqtyq synyqtardyń sıpaty aǵashtan nemese múıizden jasalǵan jalpaq doǵal zattarmen ádeıi soqqy jasalǵanyn, al tastan jasalǵan shoqparlar qoldanylmaǵanyn kórsetedi. Bul derekter monarhty o dúnıede shyǵaryp salý úshin qyzmetshilerdi ǵuryptyq qurbandyqqa shalý týraly boljamdy rastaıdy.
Alabamadaǵy Samford ýnıversıtetiniń mysyrtanýshysy Don Makkormaktyń aıtýynsha, qol astyndaǵylardy qurbandyqqa shalý tájirıbesi uzaqqa sozylmaǵan jáne Ekinshi áýlet tusynda toqtaǵan. Bıleýshiler saıası turaqsyzdyqqa baılanysty qatygez ǵuryptan bas tartyp, adam qurbandyqtaryn qyzmetshilerdiń aǵashtan jáne tastan jasalǵan músinshelerimen — ýshebtımen almastyrǵan. Zertteý avtorlary eski murajaı koleksıalaryn zamanaýı ádistermen odan ári zerdeleý qajettigin atap ótedi.