VIII shaqyrylymdaǵy Májilis depýtaty Nartaı Aralbaıuly óz paraqshasynda qýanyshty jańalyqpen bólisti, dep habarlaıdy Alash.kz portaly.
Nartaı Aralbaıuly zeınetaqy júıesindegi mańyzdy ózgeris týraly málimdedi. Endi qazaqstandyqtar zeınetaqy qoryndaǵy qarajattyń 100 paıyzyn ınvestısıalyq portfeldi basqarýshy kompanıalarǵa senip tapsyra alady.
«Halyq zeınetaqy qoryndaǵy qarajattyń 100 paıyzyn óz betinshe basqara bastady! Qazir jalaqydan aı saıynǵy 10% zeınetaqy aýdarymdaryn Ulttyq bank basqarady. Olar aqshany memlekettik jobalarǵa, Qarjy mınıstrliginiń baǵaly qaǵazdaryna salady, ıaǵnı ınvestısıalaıdy. Odan túsken tabys tómen. Al basqarýshy kompanıalar básekeles ortada sizdiń qarajatyńyzdy áldeqaıda kiristi baǵyttarǵa salyp, ony arttyra alady. Bul normany men áriptesim Asqat Qanatulymen birge usyndyq.
Endi siz ózińizdiń zeınetaqy jınaqtaryńyzdyń 100 paıyzyn kimge senip tapsyrýdy ózińiz sheshesiz. Ol úshin ótinish jazyp, qarajatyńyzdy basqaratyn jáne ınvestısıalaıtyn uıymdy tańdaý kerek. Soǵan sáıkes tabys ta artady.
Eń bastysy: bul mindetti emes, siz qarajatty basqarýshy kompanıaǵa tek qalaýyńyz boıynsha tapsyrasyz. Tipti jınaqtaryńyzdy birneshe bólikke bólýge de bolady.
Eń basty suraq: aqshamdy joǵaltyp alamyn ba? Qarajatym kúıip ketpeı me? Zań boıynsha, basqarýshy kompanıalar siz aýdarǵan negizgi somanyń tolyq saqtalýyna kepildik beredi. Basqarýshy kompanıalardyń bul jumysy men qyzmetin Ulttyq bank pen memleket qatań baqylaıdy!» — dep jazdy Nartaı Aralbaıuly.