Qazaqstan Respýblıkasynyń Kólik mınıstrligi «Ashyq NQA» portalynda aerotaksıge qoıylatyn talaptardy belgileıtin buıryq jobasyn jarıalady. Bul týraly infohub.kz saıty habarlaıdy.
Vedomstvo «Ozyq áýe utqyrlyǵy qaǵıdalaryn bekitý týraly» buıryq jobasyn jurtshylyq talqylaýyna shyǵardy. Qujat ozyq áýe utqyrlyǵyna qatysýshylardy, olardyń qyzmetin uıymdastyrýdyń qaǵıdattary men jalpy talaptaryn aıqyndaıdy.
Alaıda buıryqtyń tolyq mátini portalda joq — qazaqstandyqtarǵa normatıvtik quqyqtyq aktiniń qysqasha mazmuny ǵana qoljetimdi. Talqylaý barysynda keıbir azamattar Kólik mınıstrligin osynshama qysqa sıpattama men buıryqtyń tolyq mátini joq qujat úshin synǵa aldy.
Sıpattamadan buıryq qalalyq áýe utqyrlyǵyn paıdalanýshylarǵa, vertıporttardy paıdalanýshylarǵa jáne tehnıkalyq qyzmet kórsetý uıymdaryna talaptar belgileıtini shyǵady.
Sonymen qatar onda ozyq áýe utqyrlyǵyna jiberilgen áýe kemelerine, olardy paıdalanýǵa jiberý jáne ushý jaramdylyǵyn ustaý tártibine qoıylatyn talaptar sıpattalǵan. Ázirleýshiler ushýdy uıymdastyrý men oryndaý, áýe keńistigin paıdalaný tártibin de aıqyndady.
Buǵan qosa, buıryqta ınfraqurylym nysandaryna, onyń ishinde vertıporttarǵa, ushý-qoný alańdaryna jáne qýattandyrý ınfraqurylymyna qoıylatyn talaptar belgilengen. Sondaı-aq ushý qaýipsizdigin basqarý júıesine, avıasıalyq personaldy daıarlaý men olardyń biliktiligine qoıylatyn talaptar sıpattalǵan.
Buǵan deıin Astanada aerotaksıdiń qalaı ushatyny kórsetilgeni habarlanǵan. Premer-mınıstrdiń orynbasary Qanat Bozymbaev úkimettegi baspasóz máslıhatynda aerotaksımen júrýdiń qansha turýy múmkin ekenin aıtty. Onyń aıtýynsha, drondarmen ushý ýaqyt óte qoljetimdi bolady.
Biz tik ushatyn jáne qonatyn elektr áýe kemesi (eVTOL) AutoFlight Prosperity saǵatyna 200 km jyldamdyqqa deıin jetip, 200 km-ge deıin usha alatynyn jazǵanbyz.