Aqmola oblysynda mal sharýashylyǵyn damytýǵa bólingen búdjet qarajatyn urlaý sqemasy anyqtaldy. Memleketke keltirilgen zalal 50 mıllıon teńgeden asty, dep habarlaıdy infohub.kz saıty.
Qarjylyq monıtorıń agenttiginiń Aqmola oblysy boıynsha departamenti sýbsıdıalardy zańsyz alý faktisi boıynsha tergeý júrgizýde. Tergeý derekterine sáıkes, «Medına» óndiristik kooperatıviniń dırektory men Shortandy aýdanynyń veterınarıalyq stansıasynyń basshysy aqparattyq júıege iri qara maldyń sany týraly jalǵan málimetter engizý arqyly sqema uıymdastyrǵan.
Atap aıtqanda, 57 asyl tuqymdy buqanyń bolýy týraly jalǵan derekter negizinde búdjetten 9 mıllıon teńge aýdarylǵan. Keıin sol qujattar boıynsha is júzinde júrgizilmegen seleksıalyq jumystarǵa taǵy 17 mıllıon teńge bólingen.
Sonymen qatar, tórt ótinimde analyq mal basynyń sany 3 myń basqa arttyrylyp kórsetilgen, bul qosymsha 27 mıllıon teńge sýbsıdıany negizsiz alýǵa ákelgen.
Óndiristik kooperatıv dırektoryna qatysty úıqamaq túrindegi bultartpaý sharasy tańdaldy. Tergeý jalǵasýda.