Қазақстанның Қаржы мониторингі агенттігі интернет-казиноның заңсыз қызметін ұйымдастыруға көмектесу фактісі бойынша тергеуді аяқтады, деп хабарлайды infohub.kz сайты.
Тергеу деректеріне сәйкес, әртүрлі банктердегі жүздеген терминалды қамтыған үш бақылаудағы компанияның төлем инфрақұрылымы арқылы шетелдік интернет-казинолардың мүддесіне операциялар жүргізілген. Олардың қатарында Nomadgames, Sultangames, Pinco, Pin-UP, Vavada, Mostbet және 1WIN бар. Бұл туралы Қаржы мониторингі агенттігінің баспасөз қызметі мәлімдеді.
Операциялардың жалпы көлемі 191 млрд теңгені құрады, есептік комиссиялық сыйақы — 286 млн теңге.
«Төлемдердің мақсатын жасыру үшін заңды тұлғалар мен жеке кәсіпкерлердің деректемелері, оның ішінде олардың өздері білмейтін жағдайда пайдаланылды. Олардың атына интернет-эквайринг терминалдары ашылып, жалған шарттар мен сайттар тауарлар мен қызметтерге төлем жасалғанын көрсетті. Қаражат шетелдік контрагенттерге, оның ішінде криптовалюта арқылы аударылды», — деп хабарлады баспасөз қызметі.
Ұйымдастырушы қамауға алынды. Соттың санкциясымен төрт көлік құралына және 103 млн теңге қолма-қол ақшаға тыйым салынды.
Қылмыстық іс сотқа жіберілді. Қазақстан Республикасы Қылмыстық-процестік кодексінің 201-бабына сәйкес өзге ақпарат жариялауға жатпайды.