Jetisý oblysyndaǵy Taldyqorǵan-Tekeli tas jolynda kele jatqan Toyota Camry kóligine aǵash qulap, júrgizýshi zardap shekti. Bul týraly infohub.kz saıty habarlaıdy.
Oqıǵa 21 shildede Qarabulaq-Tekeli tas jolynyń «Ómir bulaq» tusynda bolǵan. Qatty jeldiń saldarynan aǵash jol ústine qulap, ótip bara jatqan kólikti basyp qalǵan.
Jetisý oblysy tótenshe jaǵdaılar departamentiniń málimetinshe, kólik salonynda bes adam bolǵan. «Oqıǵa saldarynan júrgizýshi jaraqat aldy. Kólikte adamdar qamalyp qalǵan joq», — dep málimdedi TJD.
Oqıǵa ornyna kelgen qutqarýshylar qulaǵan aǵashty aralap, joldy tazartyp, kólikterdiń qaýipsiz qozǵalysyn qamtamasyz etti. Eskeldi aýdany ákimdiginiń aıtýynsha, zardap shekken júrgizýshi ortalyq aýdandyq aýrýhanaǵa jetkizilgen. «Júrgizýshiniń jaǵdaıy turaqty», — dedi aýdan ákimdigi.
Qutqarýshylar júrgizýshilerdi qatty jelde saq bolýǵa, jyldamdyqty qaýipsizdik talaptaryna saı tańdaýǵa jáne jolǵa aǵash nemese basqa zattardyń qulaý qaýpin eskerýge shaqyrdy.