2022–2024 jyldary Jańaózen ákimi bolǵan Aıbek Qosuaqov qaıtadan memlekettik qyzmetke oraldy — ol Mańǵystaý oblysy ákimi apparatynyń basshysy bolyp taǵaıyndaldy, dep habarlaıdy infohub.kz saıty.
Mańǵystaý oblysy ákimdiginiń resmı Telegram-arnasynda málim bolǵandaı, taǵaıyndaý Qazaqstan Respýblıkasy Prezıdenti Ákimshiliginiń kelisimimen oblys ákimi Nurdáýlet Qılybaıdyń ókimimen jasaldy.
Aıbek Qosuaqov 1975 jyly 15 qazanda Mańǵystaý oblysy Mańǵystaý aýdanynyń Ushtaǵan aýylynda dúnıege kelgen. 1997 jyly Esenov atyndaǵy Aqtaý ýnıversıtetin «munaı jáne gaz uńǵymalaryn burǵylaý» mamandyǵy boıynsha, al 2013 jyly Kúnaev atyndaǵy Kólik jáne quqyq gýmanıtarlyq ýnıversıtetin «ekonomıka» mamandyǵy boıynsha bitirgen.
Eńbek jolyn 1997 jyly «Qarajanbasmunaı» AQ munaı jáne gaz óndirý sehynyń tuzsyzdandyrý jáne sýsyzdandyrý qondyrǵysynyń operatory bolyp bastaǵan. 2001 jyly osy kásiporynnyń uńǵymalardy tereń zertteý zerthanasynda uńǵymalardy zertteý operatory bolyp jumys istegen.
2005–2006 jyldary «Jazyq» AQ áleýmettik damý jónindegi atqarýshy dırektory qyzmetin atqarǵan. 2007–2020 jyldary «Taýshyq aýyl sharýashylyǵy» JSHS alqaly atqarýshy organynyń tóraǵasy bolǵan.
2020–2022 jyldary Qosuaqov Mańǵystaý oblysy Túpqaraǵan aýdanynyń ákimi, al 2022–2024 jyldary Jańaózen ákimi qyzmetinde boldy. 2024 jylǵy 22 sáýirden bastap osy ýaqytqa deıin «KaspıTransKom» JSHS dırektorynyń keńesshisi bolyp jumys istegen.