Abaı oblysynda «Aıdarly» ken-baıytý kombınatynyń (KBK) qurylysynyń bastalýyna arnalǵan saltanatty shara ótti. Jańa kombınat Qazaqstannyń taý-ken ónerkásibindegi iri jobalardyń birine aınalyp, eldiń ónerkásiptik damýyna eleýli úles qosady dep kútilýde, dep habarlaıdy infohub.kz.
Saltanatty sharaǵa QR Premer-Mınıstriniń birinshi orynbasary Nurlybek Nálibaev, oblys ákimi Berik Ýálı, kompanıa basshylyǵy men seriktester qatysty. Jobany «Aidarly Mining» JSHS júzege asyrýda.
«Aıdarly» KBK tolyq qýatyna shyqqanda jylyna 75 mln tonna ken óńdeı alady. Kásiporyn mys konsentratynda jylyna 226 myń tonna mys jáne molıbden konsentratynda 3,55 myń tonna molıbden óndiretin bolady. Óndiristik keshen quramyna karer, usaqtaý kesheni, baıytý fabrıkasy, energetıkalyq, kóliktik jáne ınjenerlik ınfraqurylym nysandary, sondaı-aq jumysshylardyń jaıly demalýy men sportpen shuǵyldanýyna arnalǵan aýmaqtary bar vahtalyq qalashyq kiredi.
Basqarýshy kompanıany tanystyrǵan «Aqtóbe mys kompanıasy» JSHS bas dırektory Farıt Sýfánov atap ótkendeı, jobanyń Qazaqstan ekonomıkasy úshin eleýli mýltıplıkatıvtik áseri bar.
««Aıdarly» KBK-da 3 myńnan astam jumys orny qurylady, al jobany iske asyrýda biz qazaqstandyq mamandardyń, merdigerler men jetkizýshilerdiń áleýetin barynsha paıdalanýdy josparlap otyrmyz. Bizdiń baǵalaýymyzsha, jobany iske asyrýdyń barlyq kezeńindegi jıyntyq salyq túsimderi 1,43 trln teńgeden asady», – dedi «Aqtóbe mys kompanıasy» JSHS bas dırektory Farıt Sýfánov.
«Aidarly Mining» JSHS quryltaıshysy Edýard Ogaı jańa ken-baıytý kombınaty Abaı oblysynyń damýyna jańa serpin berip, óńirdiń ónerkásiptik áleýetin nyǵaıtatynyn atap ótti.
«Búgin biz «Aıdarly» jobasynyń jańa kezeńine – bolashaq kásiporynnyń qurylysyna kóship otyrmyz. Onyń aldynda geologıalyq barlaý, jobalaý, ınjenerlik sheshimderdi ázirleýdi qamtıtyn úlken daıyndyq jumystary júrgizildi. «Aıdarly» Qazaqstannyń taý-ken ónerkásibiniń damýyna úles qosady dep senemiz. Biz úshin bul – óńirge salynǵan ınvestısıa, jańa jumys oryndary, zamanaýı tehnologıalar jáne bolashaq damý múmkindikteri», – dedi Edýard Ogaı.
Jobany iske asyrýdyń basty qaǵıdattarynyń biri – qorshaǵan ortaǵa jaýapkershilikpen qaraý. Óndiris qazirgi ekologıalyq talaptardy eskere otyryp jobalanýda jáne tehnologıalyq proseste sýdy tazartyp qaıta paıdalanýǵa múmkindik beretin tuıyq sý aınalymy sıklin kózdeıdi. Ken ornyn ıgerý aıaqtalǵannan keıin eldiń ekologıalyq zańnamasynyń talaptaryna sáıkes buzylǵan jerlerdi keshendi rekýltıvasıalaý júrgiziledi.