Depýtat Asqat Aımagambetov memleketke qosymsha shyǵyn ákeletin jáne naýqastarǵa búrokratıalyq kedergiler týǵyzatyn medısınalyq rásimderdi qaıta qaraýdy usyndy. Mysal retinde ol múgedektikti qaıta rastaý úshin mindetti túrde aýrýhanaǵa jatqyzýdy atady, dep habarlaıdy infohub.kz saıty.
Depýtattyń aıtýynsha, qosymsha jazbalar men alaıaqtyqtan bólek, artyq shyǵyndardyń sebebi keıde rásimderdiń ózi bolyp otyr.
«Memleket árdaıym qajet bola bermeıtin nársege aqsha tóleıdi, al adam ýaqytyn joǵaltyp, búrokratıaǵa tap bolady. Mysaly, 2025 jyly bizdiń komıtet múgedektikti qaıta rastaý úshin mindetti túrde aýrýhanaǵa jatqyzý máselesin kóterdi. Sóz adamnyń jaǵdaıy turaqty jáne qaıtymsyz bolǵan jaǵdaılar týraly boldy», – deıdi Aımagambetov.
Ol bylaı dep suraq qoıady: eger aýrýhanaǵa jatqyzý emdelý úshin qajet bolmasa jáne sarapshylarǵa jańa aqparat bermese, adamdy medısınalyq-áleýmettik saraptamaǵa joldama alý úshin ǵana stasıonarǵa jatqyzýdyń qajeti ne?
«Biraq adam dárigerge jazylyp, taldaý tapsyryp, joldama rásimdep, portal arqyly kezekke turýǵa májbúr boldy. Sodan keıin ol aýrýhanaǵa jatyp, qajeti bolmasa da qaıta tekserýden ótip, em qabyldady», – deıdi depýtat.
Onyń aıtýynsha, búdjet pen MÁMS júıesi úshin bul artyq shyǵyn. Adam úshin – joǵalǵan ýaqyt. Dárigerler úshin – qosymsha júkteme. Basqa naýqastar úshin – aýrýhana tósegine uzaq kezek.
«Biz máseleni talqylaýǵa shyǵaryp, densaýlyq saqtaý jáne eńbek mınıstrlikterimen birlesip, zańǵa táýeldi aktilerge ózgerister engizý arqyly sheshim taptyq», – dedi ol.
Taǵy bir mysalda depýtat júrek patologıasy bolmasa da, onkologıalyq stasıonarǵa jatqyzý aldynda mindetti EKG, ehokardıografıa jáne kardıolog keńesin atady.
«Qaraǵandydaǵy bir ǵana onkoortalyqta jyl saıyn shamamen 17 myń jatqyzý jasalady. Bul myńdaǵan qaıtalama zertteý, olarsyz medısınalyq uıymdarǵa ÁMSQ sanksıalary tónedi. Dárigerlerdiń ózderi nátıjelerdiń jaramdylyq merzimin birneshe aı etip belgileýdi, al qaıtalama zertteýlerdi medısınalyq kórsetkishter boıynsha júrgizýdi usynyp otyr», – deıdi ol.
Aımagambetov atap ótti: artyq rásimdi jaı ǵana elektrondyq formatqa kóshirse, ol elektrondyq bolady, biraq artyq bolýdan qalmaıdy.
Depýtat densaýlyq saqtaý júıesindegi bul máseleler reformany qajet etetinin aıtyp, tıisti sheshimderdi pysyqtaýǵa ýáde berdi.
Buǵan deıin Aımagambetov emdelýge basqa óńirlerge baratyn qazaqstandyqtar úshin ınvataksıdiń qoljetimdiligi máselesin kótergen bolatyn.