Air Astana bıznes-klassqa bılet satyp alǵan jolaýshylar ushaq aýystyrylǵandyqtan ýáde etilgen jaıly jaǵdaıǵa qol jetkize almaǵanyn aıtyp, avıakompanıa bul jaǵdaıǵa túsinikteme berdi, dep habarlaıdy infohub.kz.
Threads áleýmettik jelisinde medina.style_ qoldanýshysy avıatasymaldaýshyǵa shaǵym jazdy. Onyń aıtýynsha, ol Almaty — Gýanchjoý reısine jatqyzylatyn oryndyqtary bar bıznes-klass bıletterin tólegen, biraq ushýǵa az ýaqyt qalǵanda ushaq aýystyrylǵan.
«Ushýǵa birneshe saǵat qalǵanda sizder ushaqty tynysh aýystyryp jiberdińizder, meniń "jatqyzylatyn bıznesim" arqasy 15 gradýsqa qısaıatyn qarapaıym oryndyqqa aınaldy. Balamen 6 saǵat otyryp ushtym. Túnde! Jatqyzylatyn orynnyń aqshasyn tólep. Bul múldem bıznes emes! Aldyn ala eskertý kerek edi ǵoı? Olar maǵan basqa bılet satyp alý nemese kúnin ózgertý múmkindiginen aıyrdy», — dep narazylyǵyn bildirdi áıel.
Post astyndaǵy pikirlerde birneshe qoldanýshy osyndaı máselege tap bolǵanyn aıtty. Olardyń biri: «Chernogorıaǵa ushtyq. Tolyq bıznes úshin úlken aqsha tóledik. Nátıjesinde Almatydan ushamyz, bizge avtor jazǵan ushaqty aýystyryp beredi. Ashýymyz qoınyna syımady. Týroperatorymyz urysty, biraq esh nátıje bolmady. Air Astana aıyrmashylyqty qaıtarýǵa nemese kelesi ushýlarǵa jeńildik jasaýǵa mindetti dep oılaımyn», — dep jazdy.
Taǵy bir qoldanýshy: «Búgin tańerteń Gýanchjoý — Almaty baǵytynda ushtyq. Eki bıznes bılet satyp aldyq, sonymen qatar yńǵaıly ushý úshin arnaıy oryndar tańdadyq. Standartty bıletten 3 ese qymbat tóledik, nátıjesinde eń qarapaıym ushaqpen ushtyq», — dep atap ótti.
Air Astana avıakompanıasy ushaq aýystyrý jaǵdaıyna túsinikteme berdi: «Áýe kemesin aýystyrý — májbúrli shara, ol operasıalyq nemese tehnıkalyq sebepterge baılanysty bolýy múmkin. Bul rette jolaýshylardyń qaýipsizdigi biz úshin árqashan basty basymdyq bolyp qalady. Bıznes-klass oryndyqtarynyń konfıgýrasıasy kútkennen ózgeshe bolǵanyna shynaıy ókinemiz».