Airbus kompanıasy 24 shildede Fransıanyń Týlýza qalasynan Avstralıanyń Melbýrn qalasyna jańa A350-1000ULR ushaǵynyń synaq reısin jasaıdy. Bul týraly infohub.kz saıty habarlaıdy.
Uzyndyǵy 17 myń shaqyrymǵa jýyq marshrýt shamamen 22 saǵatty alady. Bul azamattyq avıasıa tarıhyndaǵy eń uzaq synaq reısteriniń biri bolmaq. Synaq Qantas avıakompanıasynyń Project Sunrise («Tań») jobasy aıasynda júrgizilýde. Jobanyń maqsaty – Avstralıadan Eýropa men Soltústik Amerıkaǵa aralyq qonýsyz tikeleı reıster uıymdastyrý.
Eger synaqtar sátti ótse, 2027 jyldyń qazan aıynan bastap Qantas Sıdneı – London jáne Sıdneı – Nú-Iork baǵyttary boıynsha toqtaýsyz reıster jasaýdy josparlap otyr.
Jobany júzege asyrý úshin Airbus A350-1000ULR ushaǵyn jańartty. Atap aıtqanda, laınerdiń artqy bóligine qýaty 20 myń lıtr qosymsha otyn bagy ornatyldy, sondaı-aq otyn júıesi men borttaǵy asqana salqyndatý júıesi jetildirildi. Bul ózgerister ushaqqa otyn quıýsyz táýlikke jýyq ýaqyt ushýǵa múmkindik berýi tıis.
Ushaqty komersıalyq paıdalanýǵa engizer aldynda jańa modıfıkasıa Eýropalyq avıasıalyq qaýipsizdik agenttiginiń (EASA) sertıfıkatynan ótýi qajet.
Bild basylymynyń atap ótýinshe, aldaǵy ushý jolaýshylar laıneriniń aralyq qonýsyz táýlikke jýyq áýede qaýipsiz bola alatynyn tekserýdiń mańyzdy kezeńi bolady.