Patshalar sansyz shyǵyn qylady,
Daıyndap soǵys úshin ǵaskerin.
Aıamaı birin-biri qyrady,
El alar oqqa baılap jastaryn.

Turaqsyz shyr aınalǵan dúnıe,
Jutady báriniń de bastaryn.
El túgil jerlerine kim ıe,
Aıtpasań molasynyń tastaryn.

Shyn patsha men emes pe ýaıymsyz,
Ǵaskerim – óleńim men sózderim.
Olardyń patshalyǵy daıynsyz,
Kóredi baıansyzyn kózderiń.

Oılańyz, bizdiń ǵasker óle me,
Qaǵazǵa bir basylyp qalǵan soń.
Bul myqty ásker emeı nemene,
Jaıylyp talaı oryn alǵan soń.

Qarýmen qansha qatty ursa da,
Sózime jannyń áli kelmeıdi.
Bul dúnıe shyr aınalyp tursa da,
Ǵaskerim qartaımaıdy, ólmeıdi.

Bilesiz, bul sózime ólim joq,
Taǵy da júrgen jerin qyrmaıdy.
Dúnıeniń rahatyna senim joq,
Eshbiri baıandy bop turmaıdy.

Almaımyn patshalyqty berseń de,
Qaıteıin, ólim tartyp alady.
Men-daǵy, ajal jetip, ólsem de,
Ǵaskerim aq qaǵazda qalady.

Oqıdy keıingiler sózimdi,
Biri unap, biri synap kúledi.
Ózimniń kórmese de kózimdi,
Zarlanyp ótkenimdi biledi.

---