Frankfýrtte ótip jatqan kórkem gımnastıkadan álem chempıonatynda irikteý jarystary aıaqtaldy. Qazaqstandyq gımnast Akmaral Erekesheva joǵary nátıje kórsetip, úsh fınalǵa joldama aldy, dep habarlaıdy infohub.kz saıty.
Eki kún boıy sportshylar fınaldyq kezeńge shyǵý úshin baq synady. İrikteýde tórt túrdiń qorytyndysy boıynsha Erekesheva 84,200 upaı jınap, segizinshi orynǵa turaqtady. Bul nátıje oǵan irikteý qorytyndysy boıynsha úzdik 18 gımnast qatysatyn jekeleı kópsaıys fınalyna shyǵýǵa múmkindik berdi.
Jekelegen túrlerde fınalǵa ár túrden úzdik segiz sportshy joldama alady. Erekesheva shyǵyrshyqpen (29,000 upaı) jáne taspamen (28,350 upaı) jattyǵýlarda irikteýden sátti ótip, eki jaǵdaıda da tórtinshi orynǵa ıe boldy. Doppen jattyǵýda ol 16-oryn (26,850), al qursaýmen 42-oryn (25,700) kórsetti.
Qazaqstannyń taǵy bir ókili Aıbota Ertaıqyzy jarystyń fınaldyq bóligine shyǵa almady. Jekeleı kópsaıystaǵy irikteýde ol 80,650 upaımen 24-orynǵa turaqtady. Ertaıqyzy qursaýmen jattyǵýda úzdik nátıje kórsetip, onynshy boldy (28,300). Shyǵyrshyqpen ol 15-orynda (27,100), taspamen 32-orynda (25,050), al doppen 33-orynda (25,250) boldy.
Álem chempıonatynyń alǵashqy fınaly juma kúni, 14 tamyzda ótedi. Erekesheva qatysatyn jekeleı kópsaıystaǵy júldeler sarapqa salynatyn jarys Qazaqstan ýaqyty boıynsha saǵat 19:00-de bastalady.