Ótken táýlikte Aqmola oblysynda qurǵaq ósimdikterdiń segiz janý oshaǵy joıyldy. Ereımentaý, Aqkól, Shortandy jáne Býlandy aýdandarynda, sondaı-aq Stepnogorsk qalasynda órt sóndirý jumystary jalǵasýda, dep habarlaıdy infohub.kz.
Aldyn ala derekter boıynsha, órtterdiń kóbi naızaǵaı soǵýynan paıda bolǵan. Órtpen kúreske qutqarýshylar, jergilikti atqarýshy organdar qyzmetkerleri jáne basqa da salalyq mekemeler jumyldyryldy. Qol jetpeıtin aýdandarda Tótenshe jaǵdaılar mınıstrliginiń avıasıasy qoldanylyp, jalynnyń taralýyn tejeýge kómektesýde.
Jaǵdaı vedomstvonyń erekshe baqylaýynda, oryndarda jedel shtabtar qurylǵan.
— Barlyq órtterdiń jalpy aýdany shamamen myń gektardy qurady. Ábigerge salynbaı, tek resmı derekkózderge sený qajet. Zardap shekkender men qurban bolǵandar joq. Eldi mekenderge eshqandaı qaýip tónbedi, — dedi Aqmola oblysy TJD resmı ókili Ersaıyn Qoıshybaev.