Aqmola garnızonynyń áskerı soty burynǵy áskerı qyzmetshiniń paıdasyna sheshim shyǵaryp, jaýapkerden zańsyz ustalǵan qarajatty óndirip, tıisti múlikti berýdi mindettedi, dep habarlaıdy infohub.kz saıty.
Qazaqstan Respýblıkasy Áskerı sotynyń resmı Telegram-arnasynda habarlanǵandaı, áskerı qyzmetshiniń «Avıasıalyq qyzmet» RMM-ge qarajat óndirý, áskerı múlikti berý jáne ótemaqy tóleý týraly talap aryzy boıynsha azamattyq is qaraldy.
Talapker 2025 jyly áskerı qyzmetten bosatylǵan. Qyzmetten bosatylǵan kezde oǵan tıesili aqshalaı tólemderden bir bóligi ustalyp qalǵan, ótemaqy tólenbegen, sondaı-aq áskerı kıim-keshek berilmegen.
İs materıaldaryn zerdeleı kele, sot talapkerden 1 320 807 teńge kóleminde qarajat ustalǵanyn anyqtady. Bul ustaýdyń zańdy negizderiniń bolmaýyna baılanysty sot ony zańsyz dep tanydy. Sonymen qatar, sot áskerı qyzmetten bosatylǵan talapkerdiń Qazaqstan Respýblıkasy aýmaǵy boıynsha jeke múlkin tasymaldaýǵa baılanysty ótemaqy alýǵa quqyǵy bar degen qorytyndyǵa keldi.
Sot sheshimimen jaýapkerden talapkerdiń paıdasyna zańsyz ustalǵan 1 320 807 teńge jáne jeke múlikti tasymaldaýǵa baılanysty 544 852 teńge ótemaqy óndirildi.
Sonymen qatar, jaýapker talapkerge qoldanystaǵy normalarǵa sáıkes berilmegen áskerı kıim-keshek pen jaraqtandyrý zattaryn zattaı túrde berýge mindetti.
Talapkerdiń emdelýge baılanysty shyǵyndardy óndirý týraly talaby qanaǵattandyrýsyz qaldyryldy.
İsti qaraý nátıjesinde talapkerdiń talaptary ishinara qanaǵattandyryldy.
Sot sheshimi zańdy kúshine engen joq.