Aqmola oblysynda altyn óńdeıtin jasyl seh anyqtaldy. Arnaıy operasıa beınejazbaǵa túsirildi. Kúdikti uıymdastyrýshy qamaýǵa alyndy, dep habarlaıdy infohub.kz Qarjy monıtorıńi agenttigine (QMA) silteme jasap.
Vedomstvonyń resmı Telegram-arnasynda habarlanǵandaı, Aqmola oblysy boıynsha QMA Departamenti prokýratýranyń úılestirýimen Shortandy aýdanynda baǵaly metaldardy zańsyz óndirgen degen kúdikke ilingen adamdar tobynyń áreketin toqtatty.
Jedel-izdestirý is-sharalary barysynda altyn kenin óńdeý jáne baǵaly metaldardy alý úshin jabdyqtalǵan jasyl seh tabyldy. Kendi usaqtaý jáne balqytý quraldary, 446 gram salmaqtaǵy altyn quımasy, 4 tonna altyn keni, 6 kg synap, sondaı-aq 2 mıllıon teńgeden astam qarajat pen 8 myń AQSh dollary tárkilendi. Tintý kezinde oq-dári jáne atys qarýy da tabyldy.
Qazirgi ýaqytta zańsyz áreketke qatysy bar barlyq adamdar, sondaı-aq zańsyz óndirilgen baǵaly metaldardyń kólemi anyqtalýda.
Kúdikti uıymdastyrýshy qamaýǵa alyndy. Tergeý jalǵasýda.