Aqmola oblysynda sot qaýipsizdik erejelerin saqtamaý saldarynan adam ólimine ákep soqqan áıelge úkim shyǵardy. Anasy balasyn emizip otyryp uıyqtap qalǵan soń, náreste tunshyǵyp qaza tapqan, dep habarlaıdy infohub.kz saıty.
Aqmola oblysy sottarynyń resmı Telegram-arnasynda málim bolǵandaı, Aqkól aýdandyq soty Qylmystyq kodekstiń 104-babynyń 1-bóligimen (abaısyzda adam ólimine ákelý) aıyptalǵan áıelge qatysty qylmystyq isti qarady.
Sot anyqtaǵandaı, áıel qonaqta ishimdik iship, úıine mas kúıinde kelip, túnde balasyn emizip otyryp uıyqtap ketken. Oıanǵan soń, balasynyń tirshilik belgisi joq ekenin baıqaǵan. Shaqyrý boıynsha kelgen jedel járdem náresteniń tunshyǵyp qaza tapqanyn rastady.
İs sotqa kináni moıyndaý týraly prosesýaldyq kelisim túrinde tústi. Prokýror sottalýshyǵa bas bostandyǵyn shekteý jazasyn taǵaıyndaýdy surady. Qylmystyq kodekstiń 104-babynyń 1-bóliginiń sanksıasy 3 jylǵa deıingi merzimge bas bostandyǵyn shekteý ne sol merzimge bas bostandyǵynan aıyrý jazasyn kózdeıdi. Jaza taǵaıyndaý kezinde sot jeńildetetin mán-jaı retinde shyn júrekten ókinýin, aýyrlatatyn mán-jaı retinde qylmystyń mas kúıinde jasalǵanyn eskerdi.
Sot úkimimen oǵan probasıalyq baqylaý belgilene otyryp, 1 jyl 6 aı bas bostandyǵyn shekteý jazasy taǵaıyndaldy. Sot úkimi zańdy kúshine engen joq.