Ақмола облысында сот заңсыз жұмыстан шығарылған бухгалтерді қайта қызметке орналастырды: әйел бұйрыққа қысыммен қол қойғанын мәлімдеді, деп хабарлайды infohub.kz сайты.
Ақмола облысы соттарының ресми Telegram-арнасында хабарланғандай, Бурабай аудандық соты әйелдің бақша өсірушілердің тұтыну кооперативіне (серіктестігіне) қарсы жұмыстан шығару туралы бұйрықты даулау, қайта қызметке орналастыру, мәжбүрлі бос жүрген уақыты үшін жалақы өндіру, моральдық зиянды өтеу және өсімпұл туралы азаматтық ісін қарады.
Сот 2024 жылғы 16 қаңтарда талап қоюшы тұтыну кооперативіне бухгалтер болып жұмысқа қабылданғанын және еңбек шарты жасалғанын анықтады.
2026 жылғы 30 сәуірде бұйрық негізінде еңбек шарты талап қоюшының бастамасымен бұзылды.
2026 жылғы 13 мамырда дауды сотқа дейін реттеу мақсатында талап қоюшы жауапкерге жазбаша талап-наразылық жолдады, бірақ серіктестік келісім комиссиясын құрмады.
Әйел сотқа жүгініп, оған психологиялық қысым көрсетілгенін, жұмыстан шығару туралы бұйрыққа қол қоюға мәжбүрленгенін көрсетті.
Сот талап қоюшының талаптарын негізді деп таныды, бұйрықты заңсыз деп тапты, өйткені жұмыстан шығару кезінде мынадай бұзушылықтар анықталды:
- еңбек шартын талап қоюшының бастамасымен бұзу туралы шешім нөмірсіз бұйрық негізінде қабылданған;
- жауапкер талап қоюшының еңбек шартын өз бастамасымен бұзуға ерік білдіргенін растайтын құжаттарды ұсынбаған. Серіктестік құжаттарында талап қоюшының бастамасымен еңбек шартын бұзу туралы өтініш табылмаған;
- бұйрықта «2025 жылғы 12 маусымдағы еңбек шартын бұзу» деген мәліметтер қате көрсетілген, ал талап қоюшымен еңбек шарты 2024 жылғы 16 қаңтарда жасалған.
Сот шешімімен талап ішінара қанағаттандырылды. Еңбек шартын бұзу туралы бұйрық заңсыз деп танылып, күші жойылды. Талап қоюшы бухгалтер лауазымына қайта орналастырылды. Тұтыну кооперативінен әйелдің пайдасына 2026 жылғы мамырдан қыркүйекке дейінгі кезеңдегі мәжбүрлі бос жүрген уақыты үшін 670 мың теңге жалақы, 50 мың теңге моральдық зиян өтемақысы, 200 мың теңге өкілдік және өзге де шығыстар өндірілді.
Сот шешімі заңды күшіне енген жоқ.