Ótken táýlikte Aqmola oblysynda birden alty tabıǵı órt bolyp, olar Birjan sal, Selınograd, Atbasar, Aqkól, Shortandy jáne Jaqsy aýdandarynyń aýmaǵyn sharpydy. Jalpy alańy 67 gektar qurǵaq shópti qamtyǵan órtter týraly infohub.kz saıty habarlaıdy.
Qutqarýshylar men ormanshylar órtke jedel áreket etip, basty maqsat — jalynnyń eldi mekenderge taralýyna jol bermeý boldy. Sóndirýge TJD bólimsheleri, jergilikti ákimdikter, sondaı-aq Marınovka aýylynyń «Aýyl qutqarýshylary», «Stepnogorsk» orman sharýashylyǵy jáne «Kenes» orman sharýashylyǵy mekemesiniń kúshteri jumyldyryldy.
Úılesimdi is-qımyldyń arqasynda barlyq órt oshaqtary joıylyp, turǵyndar men ınfraqurylymǵa eshqandaı qaýip tóngen joq.
Aldyn ala málimet boıynsha, órttiń sebebi — otpen abaısyz qaraý. Osyǵan baılanysty Aqmola oblysy TJD turǵyndar men qonaqtardy órt qaýipsizdigi erejelerin qatań saqtaýǵa shaqyryp, tótenshe jaǵdaı týyndaǵanda 101 nemese 112 nómirlerine dereý habarlaý qajettigin eskertedi.
Buǵan deıin Shyǵys Qazaqstan oblysyndaǵy orman órtin tikushaqpen 100 ret sý tógip qana oqshaýlaý múmkin bolǵany habarlanǵan. Sondaı-aq Ekologıa mınıstrligi bir apta ishinde 50-ge jýyq orman órti bolǵanyn, olardyń barlyǵy ýaqytyly oqshaýlanyp, joıylǵanyn atap ótken.