Aqmola oblysynyń Zerendi aýdandyq sotynda ysyrap pen alaıaqtyq jasady dep aıyptalǵan jylqyshyǵa qatysty qylmystyq is qaraldy. Keltirilgen shyǵynnyń jalpy somasy 70 mln teńgeden asty, dep habarlaıdy infohub.kz saıty.
Aqmola oblysy sottarynyń resmı Telegram-arnasynda jazylǵandaı, er adam Qylmystyq kodekstiń 189-baby 3-bóliginiń 1 jáne 3-tarmaqtary boıynsha — birneshe ret jáne iri mólsherde bótenniń múlkin ysyrap etý jáne jymqyrý, sondaı-aq 190-baby 3-bóliginiń 3-tarmaǵy boıynsha — alaıaqtyq jasady dep sot aldynda jaýap berdi.
Sot anyqtaǵandaı, sottalýshy jylqyshy bolyp jumys istep, 34 azamatpen olardyń jylqylaryn aqyly jaıylymǵa qoıý týraly aýyzsha kelisim jasasqan. Ol maldyń saqtalýyn qamtamasyz etý mindettemesin ózine alyp, ózine senip tapsyrylǵan múlik úshin materıaldyq jaýapkershilik kótergen.
2021–2025 jyldar aralyǵynda 34 jábirlenýshige tıesili 150 bas mal — bıe, pishtirilgen aıǵyr, aıǵyr, qulyn, sondaı-aq 10 bas usaq mal ysyrap etilgen. Joǵalǵan maldy jasyrý úshin er adam bir ıesiniń jylqylaryn joǵalǵandarynyń ornyna basqa ıelerine berip otyrǵan. Keltirilgen shyǵynnyń jalpy somasy 70 mln teńgeden asqan.
Sonymen qatar sottalýshy tabynǵa aıǵyr satyp alý degen jalǵan syltaýmen qarajat jınaý jarıalaǵan. Jylqy ıeleri aqsha aýdarǵan, ol ony óz qalaýynsha jumsap, 5 jábirlenýshige 40 myń teńge kóleminde materıaldyq shyǵyn keltirgen.
Er adamnyń kinási jábirlenýshiler men kýágerlerdiń aıǵaqtarymen, qolhattarmen, jylqy jaıylymy úshin tólem túbirtekterimen, maldyń veterınarlyq pasporttarymen, betpe-bet salystyrýlarmen, jylqylardy tanýmen jáne istiń basqa da materıaldarymen rastaldy.
Jaza taǵaıyndaý kezinde sot sottalýshynyń asyraýynda 4 kámeletke tolmaǵan balasynyń bolýyn jeńildetetin mán-jaı retinde eskerdi. «Qazaqstan Respýblıkasynyń jańa Konstıtýsıasyn qabyldaýǵa baılanysty raqymshylyq týraly» Zańdy qoldaný arqyly er adamǵa 3 jyl 6 aı bas bostandyǵynan aıyrý jazasy taǵaıyndaldy.
Jábirlenýshilerdiń azamattyq talaptary qanaǵattandyryldy: jalpy somasy 70 mln teńgeden asatyn materıaldyq shyǵyn óndirildi. Sot aktisi zańdy kúshine engen joq.