Aqmola oblysynda polısıa qyzmetkerleri memlekettik tirkeý nómirin alyp tastaǵan Infiniti kóliginiń júrgizýshisin ustady. Ol kameralarǵa túspeý jáne Astanadan Qostanaıǵa tezirek jetý úshin osylaı jasaǵan, dep habarlaıdy infohub.kz saıty.
Oblystyq polısıa departamentiniń baspasóz qyzmetiniń málimetinshe, oqıǵa 18 qyrkúıekte saǵat 9:00 shamasynda bolǵan. Patrúldik polısıa batalónynyń qyzmetkerleri «QazAvtoJol» ókilderimen birlesip, kameralar arqyly kóliginiń memlekettik tirkeý nómirin alyp tastaǵan júrgizýshini baıqaǵan.
Polıseıler Infiniti kóligin birden baqylaı bastady. Shamamen eki saǵattan keıin kólik Astana — Petropavl avtojolynyń 230-shaqyrymynda toqtatyldy.
Tekserý barysynda júrgizýshiniń júrip kele jatqanda uıaly telefonmen sóıleskeni jáne qaýipsizdik beldigin taqpaǵany anyqtaldy.
«Er adam quqyqbuzýshylyqty joqqa shyǵarmady. Ol kameralar onyń kóligin tanyp, ortasha jyldamdyqty asyrǵanyn tirkemeýi úshin nómirdi alyp tastaǵanyn túsindirdi. Júrgizýshiniń aıtýynsha, osylaısha Astanadan Qostanaıǵa tezirek jetpek bolǵan», — dedi Aqmola oblysy polısıa departamentinde.
Nátıjesinde júrgizýshige qatysty úsh quqyqbuzýshylyq faktisi boıynsha ákimshilik materıaldar toltyryldy. Onymen profılaktıkalyq áńgime júrgizildi.