Aqmola oblysynyń turǵyny eki aı boıy zeınetaqy ala almaı júr. Sebebi — medısınalyq qujattardaǵy qatelik: ony qatelesip qaıtys boldy dep tanyǵan. Bul týraly infohub.kz saıty habarlaıdy.
Sandyqtaý aýdany Petrovka aýylynyń turǵyny Tatána Jýravlevanyń týystarynyń aıtýynsha, oqıǵa Astana qalasy ákimdiginiń kópbeıindi medısınalyq ortalyǵynda bolǵan. Basqa bir adamnyń qaıtys bolýyn rásimdeý kezinde qatelesip zeınetkerdiń JSN-i paıdalanylǵan, sonyń saldarynan onyń qaıtys bolǵany týraly kýálik berilgen.
Osydan keıin áıelge zeınetaqy tóleý toqtatylǵan. Otbasy onyń jalǵyz tabys kózinen aıyrylǵanyn, endi azyq-túlik, dári-dármek jáne basqa da kúndelikti shyǵyndardy tóleı almaıtynyn aıtady.
Týystary qateni túzetýge birneshe ret árekettengen, biraq másele áli sheshilmegen. Olardyń aıtýynsha, medısınalyq mekemede ne telefonǵa jaýap bermeıdi, ne kúte turýdy suraıdy.
Zeınetkerdiń jaqyndary qyzmettik tergeý júrgizýdi, qateliktiń sebepterin anyqtaýdy, kinálilerdi jaýapkershilikke tartýdy jáne áıeldiń quqyqtaryn qalpyna keltirýdi, onyń ishinde zeınetaqy boıynsha bereshekti tóleýdi talap etedi.
Jarıalanym kezinde medısınalyq ortalyq pen memlekettik organdardan resmı túsinikteme túsken joq.
Buǵan deıin Taldyqorǵandaǵy №2 qalalyq emhana jergilikti turǵynnyń anasynyń ornyna onyń óziniń qaıtys bolǵanyn qate tirkegeni habarlanǵan bolatyn. Osydan keıin áıeldiń banktik shottary men JK-si buǵattalyp, qaıtys bolǵan mártebesine baılanysty advokatqa senimhat rásimdeı almaǵan.