Aqtóbedegi Álıa Moldaǵulova atyndaǵy halyqaralyq áýejaı 2025 jyldy 106,4 mln teńge taza paıdamen aıaqtady. Bul byltyrǵy kórsetkishten (61 mln teńge) 74,5%-ǵa artyq, dep habarlaıdy infohub.kz.
Paıda men zalal týraly esepke sáıkes, áýejaıdyń esepti kezeńdegi kirisi 3,8%-ǵa ósip, 3,47 mlrd teńgeden 3,6 mlrd teńgege jetti. Al kórsetilgen qyzmetterdiń ózindik quny aıtarlyqtaı joǵary – 11,8%-ǵa ósip, 3,08 mlrd teńgeni qurady.
Shyǵyndardyń ósýine baılanysty jalpy paıda 713,3 mln teńgeden 519,1 mln teńgege deıin tómendep, 27,2%-ǵa azaıdy. Operasıalyq paıda da tómendedi: 2025 jyldyń qorytyndysy boıynsha ol 193,8 mln teńgeni qurady, al 2024 jyly 352,3 mln teńge bolǵan edi. Bul – shamamen 45%-ǵa tómendeý.
Sonymen qatar, kompanıa qarjylyq shyǵyndaryn eki esege jýyq qysqartty – 125,7 mln teńgeden 65,3 mln teńgege deıin. Sonymen qatar, ózge de kirister eki eseden astam ósip, 52,2 mln teńgeden 121,4 mln teńgege jetti.
Nátıjesinde, salyq salynǵanǵa deıingi paıda is júzinde ózgerissiz qaldy: 2024 jyly 191,9 mln teńge bolsa, 2025 jyly 190,5 mln teńgeni qurady.
Qorytyndy qarjylyq nátıjege tabys salyǵy boıynsha shyǵystardyń azaıýy aıtarlyqtaı úles qosty: 2024 jyly olar 130,9 mln teńge bolsa, 2025 jyly 84,2 mln teńgeni qurady.
Buǵan deıin Aqtóbe áýejaıy avıaotyn qoryn eki eseden astam ulǵaıtýdy josparlap otyrǵany jáne eldegi batystyq Jet-A1 avıakerosınin jetkizetin alǵashqy áýejaı bolatyny habarlanǵan bolatyn.
Áýejaıdyń jalǵyz aksıoneri – Aqtóbe oblysynyń ákimdigi. Aqtóbe Qazaqstannyń iri qalalary arasynda halyq sany boıynsha tórtinshi orynda (Almaty, Astana jáne Shymkentten keıin) – 596,2 myń adam. Qala iri aglomerasıalardyń biri bolyp sanalady, al respýblıka bıligi bolashaqta ol Almaty, Astana jáne Shymkent sıaqty mıllıoner qalaǵa aınalady dep kútedi.